愛心無疆界，只要有心，就可以幫助他人。
（大公報記者 蘇 荣（文） 盧剛昌（圖））太子是人口老化的舊區之一，疫情持續兩年多，長者生活難上加難。近月區內一間由星級點心師傅坐鎮的點心店，就算「蝕住做」都堅持日日派飯，讓老人家獲得溫飽、暖在心頭。原來，愛心善舉背後故事，由藝人梁思浩某次買下五百個飯盒開始，而跟老闆相熟的譚校長（譚詠麟）亦常到點心店「探班」打氣。
位於太子界限街的「星點心專門店」是由一班波友集資開設的，由於有一名重量級點心師傅坐鎮，故食店多年來不乏捧場客。店長阿偉向大公報記者透露：「老闆們係一班波友，佢哋識咗好多年，想搞啲生意，咁啱其中一個老闆識得一個好厲害嘅點心師傅，所以就重金禮聘咗佢過嚟幫手。呢度都算老人區，所以有好多老人家嚟幫襯，我哋同班長者嘅關係都維持得好好。」
「呢區好多街坊都係獨居老人，好難就咁丟低佢哋。」
——店長阿偉
去年底藝人梁思浩向「星點心專門店」買下500個飯盒，並請店員分開10天代為派發給該區有需要的長者，反應十分熱烈，更有食客接力捐助。「派飯期間有熟客見到，就好奇問我哋可唔可以都出一分力。結果有唔同嘅熟客都有捐助，佢哋都不求回報，所以唔會太鋪張宣傳，但街坊間都知道。直到下月20號，我哋每日都會繼續派飯畀有需要嘅街坊。」
其實點心店已連續蝕錢兩年，第五波疫情來襲時，更為保障員工健康而全面停業。雖然賬面上未有營利，但老闆、員工與街坊多年來累積而來的感情豈是說散就散？「呢區好多街坊都係獨居老人，好難就咁丟低佢哋，而且上次派飯活動，對我哋嚟講，雖然只係做多少少工夫，但當你見到佢哋每日為咗一個盅頭飯，提早兩個鐘頭嚟排隊，到佢哋接到飯盒時嗰一句多謝，其實已經勝過一切。班街坊又好好，會主動話畀其他有需要嘅人知道，好似有啲垃圾站嘅清潔工咁，佢哋收工時間就啱啱係派飯嘅時間，結果佢哋每日都要跑住嚟攞飯，可想而知真係有一班好需要呢個飯嘅人存在。」
現時點心店每日派50個盅頭飯，老闆們本來也有意在九龍城分店派飯，但考慮到九龍城人流太多，而且長者排隊可能影響到鄰店做生意，故暫時打消此念頭。不過老闆們已在盤算用另一種方式做慈善活動，對象也是長者。
「飯盒派咗出去，心入面會好舒服，因為幫到人嘛。」
——譚詠麟
大公報記者到點心店採訪當日，親睹十多位公公婆婆在點心店門外等候。83歲的張伯伯對記者表示十分開心，「我住喺附近，上次派飯已經有攞過，最近開始派番就再嚟攞，有雞飯，有排骨飯，好幫到忙，時間慳咗，唔使煮，唔使買餸，十零分鐘就攞到。」訪問期間有街坊趕着跑來排隊，張伯伯還叮囑對方要跑快兩步，可見鄰里關係良好，互相幫忙。
店長阿偉說，派飯活動沒有指定的對象，只要有需要都可以來取。「街坊出錢，我哋出力，幫到人梗係開心啦！而且疫情影響咁大，有咩幫到呢個社會都會盡力做，派完呢一轉，如果有街坊想再派，我哋都會幫手」。
隔日記者再到點心店時，竟見「樂壇校長」譚詠麟剛好駕車到來，原來譚校長是該店一眾老闆的波友之一，間中也會來店裏走動。記者觀察所得，譚校長與店內食客頗為稔熟。
譚校長表示，派飯給有需要的人，會令自己的內心舒服，對此事十分支持。「我係嚟探吓班，幫吓手、出吓力執頭執尾，睇到佢哋做嘢係開心嘅，呢樣嘢（派飯）係正能量，派咗出去，心入面都會好舒服，因為幫到人嘛！有啲婆婆真係好慘，遲咗嚟攞唔到，喊晒口，我都會話畀埋佢，叫佢哋即刻入去做多個畀佢。我覺得應該要咁做，因為心態好緊要，疫情之下好多人個心入面都係屈住，唔開心，所以最緊要係放鬆啲心情，總會有好日子，個天總會晴朗，太陽一定會出嚟，定啲！」
「我希望所有人都捱得過疫情，香港早日回復正常。」
——梁思浩
至於帶頭在點心店派飯的梁思浩，原來自2020年年初開始，便每月自掏腰包贊助各區經營困難的小店，代為將愛心飯盒交到該區有需要市民的手上。每個月派10日，每日派100個，至今已有約2.7萬人受惠。「第一步係辛苦，但只要有人肯做，就會好似個轆咁愈行愈順」。
梁思浩笑說：「我好白痴咁幫呢個行動改咗個名，叫做『區區有飯食』，我想幫助老人家同埋面對緊困難嘅朋友。我希望所有香港人都能夠捱得過（疫情），香港早日回復正常。」
延續愛心｜區區有飯食 多人接力捐款響應
疫情陰霾籠罩香港兩年多以來，有市民失去家人，有市民失去工作，每天上街都要擔心隨時受感染。幸好，香港還有不少有心人，盡自己的一分力，努力用愛心溫暖有需要的人。
藝人梁思浩向來關心社會，不時做義工幫助基層市民和老人家，出錢又出力。2020年初的某一日，當時社會經濟已開始轉壞，他在上環一間齋舖吃飯，因為老闆娘的一句說話，便萌生了派發愛心飯盒的念頭。「嗰間舖頭由一對老夫婦打理，我聽到婆婆話經濟咁差，生意好難再做落去。當刻我好想幫到佢哋，但我總唔能夠每日都嚟，所以我好唐突咁問婆婆，可否在不影響人手嘅情況下，每日做多100個飯盒？佢哋商量咗一陣就話可以，於是我擺低咗10日嘅飯錢，請公公婆婆每日幫我做100個飯盒，再派畀有需要嘅人。對我嚟講，幫人唔會有前設，只要幫到就可以。」
贊助經營艱難小店派飯
為延續這一份愛心，梁思浩開始在不同區份發掘經營艱難的小店贊助，這樣一來，經營者有錢賺，有需要的市民又能受惠，真正是「區區有飯食」。
兩年多來梁思浩一直低調贊助食店，沒有打鑼打鼓，也沒有在社交平台洗版式宣傳，因為不想被人誤會他是以善行換名氣。「幫人唔需要周圍話畀人知，所以一直我都好低調。而家受贊助嘅舖頭外面會擺我張相，都只係想畀嚟攞飯盒嘅市民一個信心，等人知道唔係呃人，同埋就算有咩問題，呢件事，有我孭飛。」梁思浩拍拍心口，笑咪咪地說。
梁思浩的愛心行動，幫助了一班老人家和基層市民之餘，也引發了社會上其他善心人的接龍式捐助，令他非常感動。「原來真係會有人見到舖頭門口擺咗我張相，就主動同舖頭講，佢都想延續贊助，然後就擺低幾萬蚊。呢一種生命影響生命嘅感染力，唔係咁容易做到。講真，可以係一宗騙案，但係香港就係有一班咁不求回報、一心想幫人嘅善心人。我都想借呢個機會，去多謝佢哋」。
難忘受助者一句：留返畀有需要嘅人
除贊助小店讓不同區份的有需要市民有飯食之外，梁思浩也有參與派物資活動。他曾經運送奶粉給慈善機構「母親的抉擇」，亦曾到訪不同的孤兒院和安老院舍派食物，不過，最令他難忘和感動的畫面，是在大角咀鮮魚行學校一個派發大型物資的活動上。
「當時大概係第三波疫情嘅時間，市民排隊逐個上前攞物資，有一個40幾歲嘅男人拖住仔仔，輪到佢時，佢突然跪咗喺我面前多謝我。我當時好震驚，即刻畀多一包物資佢，但佢婉拒咗我，仲話希望留畀其他有需要嘅人，慢慢地佢離開咗我嘅視線。我一直最想幫老人家，但原來我忽略咗一班基層市民，原來疫情令佢哋嘅生活咁艱苦。每一次諗返起嗰個畫面，我都忍唔住會流眼淚。」梁思浩一邊說，一邊用手指擦了擦有點濕潤的眼角。
「區區有飯食」行動已實行兩年多，至今已有27間小店受惠，雖然每一間舖頭只贊助10日，但小數怕長計，累積下來支出絕對不少。幸好對梁思浩來說，未算是沉重的負擔。
限聚令之下，梁思浩無法外出晚飯、應酬，便順理成章地將錢用來行善。「暫時贊助嘅舖頭已經排到7月，我相信疫情好轉但仍然會有面對困難嘅舖頭，所以我會一直贊助落去，直到百業興旺嘅一日為止。幫到人就幫，勿以善小而不為！」
（來源：大公報A3：要聞 2022/04/25）
相關閱讀：
