（大公文匯全媒體 特約記者 陳惠芳）無綫一眾高層包括曾志偉及樂易玲等今日（21日）下午雲集電視城古裝街，錄影《乙巳年吉星高照年初一》，現場有醒獅助興，胡楓繼續化身財神，汪明荃、朱凱婷、林盛斌（Bob）、許文軒及周吉佩等亦參與演出，場面熱鬧。
網民官網狂派嬲
1月19日，《萬千星輝頒獎典禮2024》所有獎項已塵埃落定。最矚目的視帝視后由張振朗及龔嘉欣爆冷擊敗大熱楊茜堯奪視后，網上惹起熱議，有網民在TVB官方社交網瘋狂派嬲，數目多達2000個。賽後龔嘉欣回應被指爆冷奪視后，坦言並沒有不開心，「我冇諗太多，每一個角色都當最後一次去做，我盡咗力。」
無一個賽果大家滿意 無條件交換公平公正
對於有網民不滿萬千星輝頒獎典禮賽果，直指無綫內定，曾志偉表示，「無一個賽果係令到大家滿意，但可以話俾你聽呢個結果絕對公正，因為今年完全係遵從網民嘅投票，及我哋嘅同事嘅投票。有一兩個人可能攞出嚟討論，咁我哋又唔想就一兩個人，而令到個賽果突然好似內定，又會被攞出來討論。所以近乎所有賽果，都係網民投票，佢哋票數高我哋就俾。」
曾志偉續說，「好似林景程咁，當聽到佢攞獎嘅時候，好多人都喊咗出嚟。就好似以前舊規矩公司都唔會俾我，又或者我哋年紀大，都係由後生攞。但我想講今年係好公正。我哋成日都話我哋公司冇秘密，因為好多嘢都能夠洩露出去，都可能令其他藝人會覺得公司都內定咗。所以以前都會出現續約會傾條件，可能會話『我續約，你係咪俾個視帝我』又或者俾個視后同男配角咁，變咗而家知道唔使講條件，因為每一個人都憑實力，希望呢一樣嘢能夠令到我哋每個藝人好似金像獎一樣，每個攞到都係實至名歸。」
關於有提問，「傾獎呢樣嘢以前確實係有發生過？」曾志偉表示，「以前一定有。」續問「而家冇得傾？」曾志偉表示，「咁又唔係冇，我哋話俾你聽都冇用，因為我哋嘅評審制度已經決定觀眾同埋喺同事入面。咁不如俾啲心機同同事相處好啲，又或者同啲觀眾或影迷，大家拉好啲關係等佢哋投自己多啲票咁咪仲好。」但視后之爭聲音不絕，曾志偉表示公司曾考慮公開第二名，「但我覺得唔需要，而且對其他幾位入圍唔公平，不過私底下我都有安慰過第二名。」
陳懿德未有大將之風
擔任司儀的陳懿德被不少觀眾「投訴」她嘈，曾志偉回應，「呢個係佢嘅弱點，我哋會同佢傾吓，未夠大將之風，不過佢整體唔錯，未來我都希望每年都畀一位新人試吓（做司儀）。」對於頒獎禮錄得27點收視，他直言，「非常好，我哋超時咗1粒鐘，11點後收視跌咗，所以拉低咗個數。今日會開會作檢討，日後可能同嘉賓講清楚每人3分鐘謝詞，同埋考慮明年提前開場囉。」他又透露希望今年重辦華姐競選。
阿姐讚楊茜堯演戲放
汪明荃今年留港過年，已送出200多份蘿蔔糕給圈中好友。提到出爐視后龔嘉欣，她讚「幾好」。提起楊茜堯阿姐更高舉大拇指，「佢一出嚟就同我拍《婚前昏後》，演戲好放！」
相關報道：
