（香港文匯報記者 阿祖）張智霖（Chilam）慣演正派角色，於電影《誤判》中他一改官仔骨骨形象，染白髮蓄鬍鬚演大反派；吳鎮宇演頑固檢察官伸張正義，笑指拍攝過程頗開心，讚子丹想法好「open」，主意多的鎮宇常與子丹度橋，笑言「揼」子丹若還手就賠雙倍片酬，用手格都唔得！

張智霖坦言恨做反派已久：「可能我平日個樣覺得唔夠力，所以自己提出染白頭髮留鬚盡量夠力一啲，而作為演員都希望跳出框框，其實不論正邪角色，其他如演病人或者不正常戀情都想試，不過投資人亦未必會冒這個險，所以好多時演員都很被動。」

鎮宇主意多「火花」不斷

吳鎮宇指原本導演甄子丹想他去「呃吓」觀眾做最後的大Boss，但覺得自己代表司法機構的角色不可做得衰衰格格，應要靠手法去表達，反而現在出來的一個頑固上司不體諒下屬，形成到一種壓力已經足夠。鎮宇指拍攝過程頗開心，因為大家可以開放式去討論，他的提議子丹都會接受。過往有否不接受的都要跟着去演？他說：「以前喺電視台時會有發生，反而愈大導演接受能力越高，不過大導演通常唔理你，但我亦係唔理講咗先，一講完佢哋就會去諗，最後都照我方法去拍，個個導演我都會改，好多亦都會接受，好似拍《無間道》《鎗火》時我都有質疑一啲嘢，拍林嶺東我提出佢又好快會去諗，之後會講『呀，係喎。』，或者佢話『唔係咁』，到自己聽完之後亦都會理解咗，每個人在創作時都有自己的想法。」張智霖亦認同說：「我都會有好多諗法，亦都唔係好識就住人去講。」鎮宇取笑他近朱者赤，Chilam笑答：「唔係㗎，我拍戲時都激死好多導演。」鎮宇解釋，因為工作上應該聽哪一邊是有一定規矩，但有時講出來或者提出意見去抗衡之後，才能刺激到導演有新的想法。

戲中吳鎮宇跟甄子丹有一場「隻揪」戲，鎮宇裝作不屑說：「咩叫隻揪，係我揼佢，OK。」宇宙最強都敢「揼」？他笑說：「你分清楚，唔係互毆係我揼佢，因為好耐冇喺片場見過子丹，之前佢拍《葉問》都係打，今次做律師我話觀眾好希望你俾人揼。」又係你要求加戲？鎮宇自辯：「我咁講啫，意思係你可唔可以俾人打到變豬頭咁，一個律師無啦啦又宇宙最強，你就平實啲啦，一個律師應該有少少缺陷才好睇，可能佢就聽錯咗吳鎮宇想揼佢，就留返場戲俾我揼佢囉。」他指子丹好好笑，那場戲講二人之間有誤會要和解便說要打一場交：「我就話要用語言令我好忟，畀個機會我同你隻揪，我真係『窩』佢，我大力㗎。」子丹有否還手？鎮宇笑說：「我梗係唔會畀佢咁做，講明簽晒合約唔能夠還手，還手就賠雙倍片酬，用手格都唔得！」不過他讚子丹想法好「open」，不理對還是錯，講出來大家會再去篩選，是好有趣的模式，會繼續將個劇本做好。

張智霖不喜武鬥愛文鬥

而劇本中原本安排Chilam結尾與甄子丹大打一場，但Chilam覺得無得同子丹打，鎮宇搭口：「費事你打傷佢，佢去唔到荷里活！」Chilam亦搞笑說：「呢個係其一啦，其實可以諗其他方法，鎮宇同子丹打咗一場，咁不如文鬥啦！」鎮宇指現在觀眾不喜歡警匪最後就決鬥的一般模式，當然武鬥仍有一定票房，但好似不夠文鬥的觀眾多。

鎮宇最近看過《破·地獄》，他笑言現在有樂悠咭的長者可以有半價都未必入戲院，但許冠文（米高）和黃子華就能夠一網撈起上世紀六七十年代到2000年的觀眾：「尤其係老人家都去睇，我哋第二時《破·地獄》又點先，呢個氛圍幾得意，我問阿媽佢話好睇但冇喊，可能老人家咩都見過，我自己就為我專業嘅尊嚴忍得好緊要。戲中成家人同米高嘅演出方法都出奇地嚴肅，每個情況都到，整個戲帶動到，好感人。」而《誤判》中吳鎮宇和演法官的米高及演司長的汪明荃（阿姐）同場演出，他帶笑說：「阿姐見返我哋才肯嚟，我都有抽阿姐水。」

鎮宇Chilam「半生不熟」

再次與米高合作，鎮宇表示：「今次很開心可以近距離觀察佢點樣演戲處理劇本，但發現原來佢同我哋一樣。」Chilam很有默契地接上：「半生不熟。」鎮宇便解釋說：「我一路同你sell劇本背太熟唔得，米高都一樣。」Chilam表示以前會將劇本讀到爛熟，鎮宇就教他不要太框着自己，還叫他睇劇本不如去飲多杯，因他見過Chilam之前讀好劇本最後被導演改了，感覺慘絕人寰，Chilam說：「試過唸好晒就改咗，其實表演有好多方法，做足功課有時又未必有用，唔做功課又好似好心虛，所以半生不熟係好正。」鎮宇認同隔夜把劇本唸好會令整個人好興奮，會記掛住好想去試。Chilam說：「即係架撐攞太多冇赤手空拳咁好睇呀！呢啲級數好勁㗎！」鎮宇指電影是逐個鏡頭拍，以前TVB拍三頁紙都不用看劇本，其實一人一句沒可能記不到，唸半個鐘實記得，那為何不讓自己前一晚舒服點。是否演戲已爐火純青，現拍戲都已很少NG？他表示其實誰都想執正一點，但往往是沒時間來多拍一次，像今次開拍前有圍讀，開工時又讀一次劇本已知道大概流程，只要問清楚導演前後就可以埋位。

（來源：香港文匯報B07：娛樂 2024/12/19）