（香港文匯報記者 梁靜儀）唐詩詠、陳山聰、劉穎鏇（Tiffany）、劉佩玥(Moon)、江美儀、林子善、歐瑞偉、吳家樂、 郭子豪、伍樂怡、關嘉敏及監製文偉鴻，昨日到觀塘出席無綫劇《隱形戰隊》「誰是最佳拍檔」活動，眾人大玩啜乒乓波遊戲外，現場又播放馬明與唐詩詠的激吻戲片段，令全場嘩然，詩詠睇到也掩嘴大笑。子善笑言馬明屋企已被打爛了兩部電視，詩詠就說：「可能今日播呢段戲，所以佢今日專登唔嚟，播出時大家記得網上唔好tag佢，呢場戲根本同原先劇本唔同，係臨時即興拍，不過我諗對於馬明嚟講都應該係最後一次，而我都無咩機會再有。」
事後詩詠受訪問時表示今次是從影以來最大膽的一次，更笑言以後不會再拍：「唔會再拍喇，一直覺得呢類戲美劇先會拍，TVB 唔會拍到，拍激情戲好辛苦，又要度位好準，又怕撼到，所以拍攝時我同馬明都盡量唔NG，最重要係呢類愛情動作戲唔係我專長，交返畀阿Moon ， 動作愛情片好難拍，我寧願只拍動作。」 說到電影尺度較大膽，她又可接受？詩詠稱要看劇本再定。
詩詠揀男友首選亞洲人
詩詠出場時獲粉絲報以歡呼聲，她表示已很久沒有見粉絲，現時只有出席公開活動才見到他們。她又稱現時主要煲劇、享受生活及陪伴家人，並計劃六月與江美儀去日本跑步。說到她還缺少了個男友？詩詠笑說：「 可能喺日本跑步時識返個， 𠵱家學緊日文，揀男朋友首選係亞洲人，最緊要溝通到，同埋文化上唔好有太大差異。」
現場又播出山聰為Tiffany拉筋拉到幾乎面貼面的片段，兩人受訪時表示該場口講述兩人開始互生情愫，非常好看。對於劇集播映以來收視不俗，山聰開心指《隱》劇暫時是今年八點半檔最高收視，很感謝觀眾及網民支持：「雖然呢套劇同《超能使者》嘅班底差唔多，播出時間又好接近，但反響好好，成績比《超能使者》更好，所以拍得幾辛苦都係值得，多謝台前幕後人員。」
山聰合約長不受裁員影響
提到近日無綫裁員，山聰說：「每間公司都會有呢個情況，我都喺公司廿年，經歷過高高低低，好多人走咗又返嚟，希望疫情過去，公司穩步上揚，可以有好消息請返啲同事。（認識嘅幕後同事有冇受影響？）我唔知，我剛由蜆港返嚟，暫時未收到消息。」說到他也無須擔心被裁時，他呆一呆說：「吓！俾你嚇一嚇，世事難料，我暫時都OK，我人工好低，而且仲有好耐約。（你係視帝唔會俾人炒？）咁我都仲拍緊新劇，暫時仲有工作， 𠵱家係艱難時期，要諗方法共渡難關，要上下一心。」
另外，Tiffany 在劇中經常以不同顏色的小背心登場，她笑言已經麻木，山聰提議她可以推出一個時裝品牌專門賣小背心，應該相當受歡迎。
（來源：香港文匯報A21：娛樂 2023/03/28）
