（香港文匯報記者 李慶全 梁靜儀）甄子丹與太太汪詩詩、曾國祥、鄭志剛夫婦、唐英年等昨晚到西九文化區M＋出席慈善籌款活動，已有一年沒有在港公開露面的甄子丹，之前主演的電影《搜救》票房失利，他以人生作比喻，認為總會有高有低。而對於主演新作《天龍八部之喬峰傳》 ，他強調會保留個人風格，並指如果話《葉問》一個打十個，喬峰就是一個打一百個。

甄子丹受訪時表示剛在內地拍完自己監製及演出的電影《天龍八部之喬峰傳》，之後再去了羅馬匯合太太及兒子旅行，因兒子要回港返學，故此行只去了幾日。汪詩詩表示兒子覺得很好玩，覺得羅馬這個地方很有歷史價值，可以睇到很多故事。子丹表示事前特別度好期過去匯合太太與兒子，因之前周圍飛，又在內地拍戲拍了很耐。汪詩詩指所以現時去旅行，不會預老公份，如他能加入就已覺得好幸運。

談到工作，子丹表示現時為《天龍八部之喬峰傳》做後期，該劇由籌備到拍攝用了超過大半年。他坦言拍古裝劇不單很辛苦，加上又是金庸原著，難度都頗高，因大家都是看金庸小說大，對小說裏的角色、故事情節都非常熟悉，要將小說濃縮為電影要好有技巧。他又透露戲中要打到飛起：「如果話《葉問》一個打十個，喬峰就係一個打一百個，（今次都係你一貫嘅硬橋硬馬？）係有自己嘅風格，希望今次喺金庸世界裏面都保留自己嘅風格，因為之前已有好多人演過喬峰呢個角色，好彩我有個好強嘅團隊幫我，喺動作上打到人哋飛起。」至於影片何時上映，他就未決定，希望做好後期先。

繼續拍宣揚中國的電影

談到近期多部港產片都大收旺場，這是很久未試過的，子丹表示都有留意，但因自己剛回港，暫時都未有機會去捧場。對於多部港產片都有好成績，子丹認為市道復甦絕對是好事：「我覺得用心去拍一部電影，觀眾眼睛係雪亮嘅，好嘅電影成功要靠天時地利，唔係拍部好戲出嚟就收得。」他又稱自己拍戲多年，見到同行有好成績好替他們高興。

說到他主演兼監製的電影《搜救》，在內地上映超過一個月，但票房只收約二千萬人民幣，成績差強人意。子丹以人生作比喻說：「一部電影就好似人生總有高有低，自己都已盡力，作為電影人及演員，每次演出都豁咗出去，嘗試唔同題材同角色，可能有部分電影比較商業，又有天時地利，但唔緊要，呢啲就係人生。」

對於票房失利的原因，有人歸咎認為是文戲多動作戲少，他就認為每個人睇戲及評價都不同，每人都有自己杯茶，總之各花入各眼。汪詩詩坦言自己雖沒睇過《搜救》，但影片製作後期時都睇到劇情令人好感動。再問到子丹可會失望？他說：「人生都係有高有低，都係會做好自己，繼續宣揚多啲中國題材嘅電影，無論係災難片、悲情片、打鬥片、動作片都好，每部戲都有佢自己嘅成果。」

曾國祥補度蜜月 暫不造人

另外，曾國祥近一年都不在香港，他表示回來個多月，之前在英國拍Netflix新劇《三體》，該劇監製是之前電影《權力遊戲》的監製，劇集是改編內地科幻小說，明年5月大家應該可以看到。

首次拍Netflix劇集的國祥表示今次是抱着學習的心態，因為是大製作，團隊好專業，而拍攝前他都有調整自己的心理狀態，因為美國的製作模式，監製是最大話事權，自己做導演似執行導演，很多事事前都要同監製溝通才可，最初都有點不習慣，但合作後都很開心。問到回港後可會幫爸爸曾志偉手？他笑說：「佢公司咁多導演，同埋我哋都係各顧各，不過我一直都好留意爸爸做嘅嘢，（如果爸爸開到口又會否幫手？）我知道佢唔會開口嘅，我哋講咗互相避免咁做。」

至於會否再為Netflix拍劇？他認為拍劇都是大勢所趨，都想再傾，尤其自己成立咗新公司，都希望物色年輕導演，拍一些香港、內地、台灣的故事，希望能打響國際市場，他亦會擔任監製。他透露新公司是與兩位導演黃進及鄭思傑合作，至於頭炮亦未落實是否由自己拍攝，現先要搜羅故事。

問到他在英國拍劇期間，太太王敏奕可有前往探班？國祥表示太太原本想去探班，但她自己亦要拍新劇，加上疫情關係又不能回港，最終兩夫妻10個月沒見面，不過完成工作後就與太太去了意大利補度蜜月，因為結婚3年一直沒有去度蜜月，不過就沒送禮物，只送了花。問到是否兩個去三個返？他笑着否認說：「冇冇冇，唔好搞住，我搞掂自己先，暫時唔計劃造人住。」

（來源：香港文匯報A23：娛樂 2022/11/08）