文/稀思路

如果讀者們有留意「筆是機場」專欄，可能會發現筆者喺分析移英港人時，有時會點出一個核心邏輯，就係呢班人去到英國，無論權利點受到剝削，基本上都係唔敢喺英國「抗爭」；但係，如果事件涉及中國因素，呢班人就會非常「勇武」。最近一班移英港人，出嚟反對中國喺倫敦興建具規模嘅大使館，手法同喺香港抗爭時如出一轍。筆者睇真啲，連香港通緝犯都有？涉嫌觸犯香港法律被通緝，喺英國反對中國興建大使館，唔通真係「移英是生活，反中是工作」？

日前一則新聞，內容係關於中國要興建大使館，「居民擬司法覆核眾籌半日急增逾倍　被懸紅通緝港人憂打壓加劇」，睇相關嘅新聞圖片，見到有人熟口熟面，上網搜下資料，原來係蒙兆達。呢個蒙兆達係咩人？根據香港警方資料，蒙兆達喺「2022年6月出席一個境外組織會議，抹黑中央及特區政府，並鼓吹將香港特別行政區從中華人民共和國分離出去」，而且呢個通緝犯，仲係警方以100萬元懸紅通緝嘅人。當移英通緝犯，要反對中國興建大使館，講真，有幾大說服力？

就如文章開首所講，移英港人嘅特質，就係「英國政府唔敢反，中國政府大力反」，呢種心理，其實多多少少同佢哋喺香港時嘅反政府心態有關，但凡係特區政府以至中國嘅事，佢哋通常都係似反對意見。相反，如果事件同西方國家例如英國有關，佢哋就算反對、遊行，都係非常溫和，因為佢哋內心有「崇洋」心態，而且，佢哋從心底就唔敢太大力反對西方國家。

筆者咁講，係有例子嘅，以英國政府計劃收緊移民政策為例，有移英港人透過搵自己選區嘅議員，希望議員幫幫口，等英國政府「手下留情」；就算發起遊行，都比起喺香港嘅時候溫和好多，如果佢哋太激被捕、被控，基本上就冇乜可能喺英國申請永久居留。如果佢哋反對英國移民政策，點解唔用返喺香港嘅套路，喺街頭抗爭，喺法庭入稟，以及要求英國政府就違反諾言問責呢？呢班人徹頭徹尾就係西方國家嘅奴隸。

回到今次主題，關於中國計劃喺英國興建新嘅大使館，其實反對者嘅理據，都幾陰謀論，例如係擔心干預、滲透，之前筆者上網睇到，甚至係講到會竊聽等等，呢種捕風捉影式嘅反對，同佢哋以前喺香港反對特區政府以至國家，都係同一個套路。但筆者想問，「證據呢？」如果憑空猜測嘅指控，可以反對大使館嘅興建，呢班移英港人，似乎真係人移居咗，但盲反心態完全冇改變過。

佢哋依家打算提出司法覆核，據報其中一個理據，係質疑英國政府一早有「內定」結果，但係，中國外交部發言人郭嘉昆就明確指出，外交館舍建設提供必要支持與便利係東道國應盡嘅國際義務，又指中國駐英國使館新館舍整個申請及獲批過程完全遵循國際外交慣例同當地法律法規。即係，中國做法完全合法、合規，一班移英港人，既然移民咗，又何必將「反中」生活，帶到去世界唔同地方？思維不變，人又點會進步。