（香港文匯報記者 阿祖）賀歲片《祥賭必贏》前晚舉行名人優先場，戲中4位演員蔡卓妍（阿Sa）、張繼聰（阿聰）、朱栢康（朱康）與吳家忻出席，阿聰獲有份客串的太太謝安琪（Kay）攜仔女撐場，而阿Sa的好姊妹容祖兒（Joey）亦前來捧場，之前Joey曾大讚朱康靚仔，合照時朱康被安排站在阿Sa與Joey中間，他顯得一臉害羞，終於見面，Joey更做出「開心到飛起」的甫士。

謝票時，謝安琪向觀眾表示：「我今日係好早嚟到嘅，但我對鞋突然甩底，好彩我嘅同事專登買對鞋搭救。雖然我對鞋係甩底，但我個人係冇甩底，新一年係要有呢種拚勁！」坐在觀眾席的Joey在朱康發言時用手機狂影相，觀眾和阿Sa齊齊大叫「朱栢康真係好靚仔呀」「容祖兒都覺得朱栢康好靚仔呀」。

阿Sa夥張繼聰組「Louisa」

阿聰與阿Sa前日走足8場謝票，阿Sa直言從未試過謝票這麼好玩，二人隨即又介紹他倆是全新組合Louis（阿聰英文名）加阿Sa組成「Louisa」，阿聰笑說：「之前我去台北做嘢，見到間Louisa咖啡，就覺得我同阿Sa都可以組合，不過我哋冇嘢做，係空殼公司。」阿Sa亦笑謂他倆是謝票組合。

阿聰表示看過《賭》片的觀眾，就知今次非傳統賀歲片，當中有破格演出，贏來正評，就連馬來西亞的觀眾也說是久違的港式賀歲片，所以對票房充滿信心。提及高海寧（高Ling）承諾《麻雀女王追男仔》票房收8千萬元便穿泳衣派福利，古天樂亦指《臨時決鬥》收過這數字便派張文傑和胡子彤穿T-back，阿聰醒目地「抽水」：「如果我哋部戲收5千萬元，胡子彤就可以着T-back，如果我哋收1億元，高海寧就可以自由發揮，我相信佢唔會令大家失望嘅。」但自己沒貢獻？他笑說：「如果過億票房，我哋會搞個盛大派對公布！」他直言若感受到觀眾的誠意，自然會出動，不過卻叮囑觀眾看完不要後悔。

朱栢康被坑派勁爆福利

阿Sa又會否肯穿泳衣派福利？她扁嘴笑說：「我怕趕客，不如5千萬元票房就送飛吻，寫真集我都有着過泳衣啦。」阿聰表示未想好怎樣派福利，但如果票房好，驚喜會一浪接一浪，如果成真或會表演人體彩繪：「個尺度我同朱康傾一傾，因為執行係朱康，總之朱康着T-back一定走唔甩！」阿Sa亦立刻「交波」喊話吳家忻着泳衣：「我都冇嘢睇，我着泳衣去戲院凍鬼死。」

阿聰指若票房好他跟朱康一樣可以着泳衣，希望觀眾先給一點誠意，最起碼先有三四千萬票房。朱康聞言指大家稱兄道弟，阿聰着自己也一定着，至於指明他做人體彩繪自己一定唔會就範。家忻大方說可以穿泳衣，提議搞場沙灘影院謝票穿泳衣才更有噱頭。

之前朱康猜中《破·地獄》收1.5億元票房，今次賀歲片《祥賭必贏》他繼續估會收過億票房。家忻在旁更大膽估會收3億票房，朱康鼓勵講得多、想得多也有可能成真。笑言他這次再估中票房，以後不用做「明燈」，朱康笑說：「係喎，有料到，以後每位監製拍完戲都要搵我傾一傾喇！」

（來源：香港文匯報A16：娛樂 2025/01/27）