黃店大渣哥茶記last day　網民揶揄：熱烈慶祝

大公文匯全媒體報道，被揭欠租上百萬的大渣哥早前宣布會喺未來兩個月全線結業，其中位於九龍灣的大渣哥茶記，已於昨日最後營業。去咗英國、靠黃上位嘅「奀星」阮民安，又乘機拎人光環，在社交平台發文話覺得好惋惜，指日後在香港重遇的機會相信都微乎其微喎。不少網民揶揄佢「又抽水」、「喺屋企做冷氣軍師」、「又出嚟博人課金」。

阮民安噚日在fb借大渣哥結業發文，指大渣哥茶記今晚之後正式結束營業，覺得好惋惜喎，又懶感咁話「無論有幾多流言蜚語都好，我只會記得大家一齊行過嘅路」，並指大渣哥今日同香港人一別，日後在香港重遇的機會相信都微乎其微。不過，網民就唔同情，留言反嘲「抵L死」、「跟本唔好食」、「渣哥執笠，我開香檳，熱烈慶祝！幫手足？我呸，垃圾、圍內、小圈子」。

由前港姐冠軍譚小環及蔡強榮（渣哥）夫婦創立的大渣哥茶餐廳及渣哥一九九六懷舊小食店，曾在修例風波期間大發黃絲財。所謂風水輪流轉，香港社會已復常後，其生存空間即大大壓縮。「大渣哥」日前在fb發道別文，表示將全線告別香江，九龍灣店將營業至昨日（12日），而德福店亦將在7月8日最後一天營業，而該專頁已暫停更新。