（香港文匯報 記者 阿祖）歌唱真人騷《中年好聲音2》於年初二播出第九部曲《陳慧嫻金曲賽 喜氣洋洋賀十二強！》下半場， 有肥媽、伍仲衡、張佳添、周國豐和陳慧嫻擔任評審。經過一輪激戰，越唱越強的譚輝智獲得93分第三度獲得MVP，王玥和劉可被淘汰。
實力唱將譚輝智獻唱《歸來吧》，憑着真摯的歌聲將曲中的寂寞、委屈和思念等情感發揮得淋漓盡致，肥媽被他感動得毛管戙兼爆喊，最終輝智獲得全集最高分93分，張佳添更獻出首個20分。對於輝智演出，慧嫻大讚：「你係後起之秀，成為四大天王其中一位！你呢個男仔Version我好滿意，呢隻歌好難唱，但你完全揮灑自如。」肥媽講評語時再度落淚：「我哋成日出去做嘢，除咗疫情，我三十幾年冇同屋企人過年，佢唱出咗嗰種感覺（離鄉別井），我嘅感受比任何人都深，你唱時我已經喊同毛管戙。」獻出20分的張佳添說：「你將我第一次嘅20分攞走咗，畀你touched到，無論係你嘅聲線定係表情，感受到好想家嘅感覺。」周國豐笑言：「點解你靚仔咗咁多，又係偶像又有實力。」勇奪93分的輝智最終第三度獲得MVP，負責頒發MVP的慧嫻說：「佢令我好surprise同估唔到，佢將一隻女仔歌變成咁費玉清！」內斂的輝智笑言：「想多謝Rita老師（韋綺姍），人生第一次學唱歌就係Rita老師教，學咗好多嘢，同埋多謝添Sir畀咗20分，我驚今晚瞓唔着。」
劉可被淘汰仍充滿正能量
14名選手演出完畢後，同樣獲得79分的劉可和陳蒨葶，以及獲得75分的王玥留在危險區，王玥因為獲得最低分關係毫無懸念被淘汰，劉可和陳蒨葶「邊個有得留低」則要評審團退庭商議，最終劉可被淘汰，宣布結果的張佳添坦言：「呢個絕對係好困難好痛苦嘅決定，都有啲傷感，要離開嘅係劉可，由第一集你畀到我哋驚喜，到中間畀到啲好正、有啲爭議性嘅演出，其實你係一個真正嘅Artist，你要繼續唱歌，唱多啲好歌。」而被淘汰的劉可未有太大傷感，繼續保持正能量，他說：「好慶幸企喺呢個舞台，始終我太耐冇唱喇，咁多位都好犀利，呢一刻我都好開心，唔係好傷感。今次最開心係可以見到陳慧嫻老師，雖然今次呢隻歌唱得有失水準，但好想同你講你係我畢生嘅偶像，最後仲要多謝我嘅屋企人、fans同埋朋友，係我最大嘅back up。」
12強名單正式誕生，分別是鄭梓浩、陳俞霏、陳蒨葶、林若盈、安雅希、顏米羔、沈宗賢、陳燕娜、古淖文、黃劍文、劉威煌和譚輝智。
（來源：香港文匯報A14：娛樂 2024/02/13）
