大公文匯全媒體報道，英國幾乎每日都有新一輪的罷工正在上演！有移民港人日前在社交平台發文話，返工日遇正火車罷工，唯有早一個鐘出門口，坐巴士轉地鐵，但都逃不過塞車，然而放工先至「超淒涼」，因為兩架巴士都無限延遲，大呻「淨係放工呢程車，我都搞咗兩個鐘。」猶記得，2019年黑暴時，一幫暴徒也搞過大三罷，有網民揶揄就「你們都忘了嗎？針刺到肉，終於知痛了吧？」、「點解咁Ｘ艱難都要返工，在港時又成日阻人返」、「手joke喺香港時唔係好鍾意罷工咩？enjoy」。

該名移英港人日前在fb群組「英國香港人貼地生活資訊交流區」發文講述經過，指「噚日火車罷工，唯有坐巴士轉地鐵，已經早咗一個鐘出門口，但都逃不過塞車，好在都叫做踏正返到去」。之不過，放工時就「超淒涼」，皆因明明有兩架巴士可以返屋企，點知兩架巴士都無限delay，「睇住佢由delay10分鐘去到50分鐘，仲要大排長龍」。

樓主於是想盡方法返屋企，指「行路嘅話都係個零鐘，等得50分鐘，都差不多行咗返去，再諗，條龍都有香港人，唔知可唔可以夾錢坐uber呢？」正當樓主感到徬徨無奈之際，「突然前面部巴士個司機話可以車到去近屋企嗰個站，但不停站㗎，直達㗎」。樓主就梗係上車啦，司機在中途解釋指，「呢班係特別班次，因為巴士路線delay，所以整咗呢個特別班次畀你哋，希望你地可以盡早返屋企啦」。樓主直言，「我都好想快啲返屋企，淨係放工呢程車，我都搞咗兩個鐘。」

最後，巴士去到終點站，樓主便落車，惟有些乘客卻唔落車。之後樓主望返轉頭，發現「架巴士又好順攤咁開返原先路線，結果係剩低嘅乘客都可以返到屋企，形容「果然英國係估你唔到」喎。不少網民就揶揄「喺香港遲少少就粗口問候喇」、「好凶惡嘅香港人去到外國果然全部變晒順民」、「呢啲係英國情趣慢慢享受」、「英國乜都好，千祈唔好返嚟啊！」