香港文匯報報道，楊千嬅前日度過50歲生辰，人生半百大日子，她選擇了與歌迷會一起度過，搞了一個近千人的《MEET YOU AT THE HALFWAY MINI CONCERT 生日限定》大派對，除了選唱了不少平日少唱的歌，讓歌迷驚喜萬分之外，亦把自己這幾年的經歷及心路歷程公開，用作鼓勵所有愛她的朋友，希望大家於人生面對困難時要學會不要放棄自己，對話超級真情流露及感動。

千嬅因為早前不少歌迷提出要求希望跟她慶生，於是她很短時間內，用了兩星期急趕籌備這次與歌迷會超級粉絲聚會的生日會，千嬅說：「我喺香港出生長大，我一早決定50歲一定要喺呢度同家人及朋友過，好多謝你哋陪我過呢個生日，我真係冇諗過，自己唱歌會唱到半百，哈哈！除咗感恩、感激，呢段咁長人生路程，回頭望係非常精彩，亦從沒遺憾。今日來到嘅朋友，我知你哋已經係我家人， 感謝你哋多年來選擇咗我，聽住我嘅歌，同我一齊成長， 我好耐冇喺香港表演，我唔想喊呀，喊完鼻涕又變痰，唱唔到好唔抵，哈哈！」

接着，千嬅唱出《火鳥》、《直覺》、《孔雀》、《深紫色》、《我係我》，唱到《無來無去》之前，她說，「今日大家陪我『入五』，我希望用一啲平日冇唱、少唱嘅歌送畀你哋。隨住《火鳥》呢首歌， 其實我有千言萬語想同你哋分享，剛剛《火鳥》一句，我呢一刻先真正明白咩叫做『今天火鳥在洪爐外飛舞在懸崖上看雲裏有星』，我今日見到粒星。」全場歌迷大歡呼！

低潮期一度死頂扮開心

繼而千嬅再唱出《偷生》、《嬅麗緣》、《我是羊》、《稀客》等歌，又再同歌迷傾偈說： 「呢幾年你哋過得好嘛？我知大家有過唔同經歷，都一定係非常之唔容易，我自己都經歷咗好大考驗，相信大家都目測到我嘅過程，感謝曾經好擔心我嘅朋友，你哋唔使擔心我，我過得好好！過程係好唔容易，但係我終於知道，楊千嬅出生就係要學識解決問題，我發現我回望人生，我都係笑比哭的多，都係開心嘅人生。過去嘅日子，經歷高山底谷，得到好多養分同智慧，我今日好想分享畀大家聽，之前嗰幾年其實都幾難過，你見到我唔係好出嚟，匿埋咁耐，時肥時腫，被人影到畸形樣，哈哈。新時代網絡風暴係一個好震撼嘅經歷，我乜都遇過晒， 幾十歲人我同自己講，有咩未見過？真係低處未算低，當我經過呢段日子，我發覺自己真係好強大，今日好感恩，上天畀我喺有力氣時，經歷呢個浩瀚人生。」

她又真情流露同大家分享情緒問題，「低潮嘅情緒係無色無味，當人負面時，要容許自己唔開心，我都試過死頂，唔想被人知我唔開心，刻意扮開心嗰陣，嚇親好多人，大家好擔心我，嗰一刻我又迷惘又唔知發生咩事，好困擾。尤其見到自己啲音樂，CD碎到一地都係，個心好痛，我連朋友都唔敢再關注，你鬧我冇問題，唔好鬧埋我啲朋友，諗住一個人撐唔好害人，曾經我覺得好恐怖，所以首先選擇熄機，唔好睇唔好理，唔好聽，休息啦，畀自己時間消化。」

鼓勵歌迷變相幫返自己

那段時間，她感謝歌迷的鼓勵，「其中有一個歌迷，佢將我多年來上台講得獎感受的說話，剪咗幾分鐘片畀我，好似成三分幾鐘，我一路睇一路喊， 原來我同人講過嘅嘢，曾經幫到人，最後今日幫返我自己，我發現困難時只有自己救自己，唔好放棄自己。今日我想同愛我嘅人講，希望你記得，面對任何困難，記住有心跳就有希望，唔好放棄自己！」全場報以熱烈掌聲。

講心聲期間，千嬅多次眼泛淚光，忍不住哭了後，她搞笑大叫：「人生無去無來，音樂係有來有住，我會努力做更多新作品，唱多啲歌，希望可以繼續鼓勵到你哋。」

到唱《還有事情可慶祝》時，全場歌迷大合唱之外，又高舉香檳氣球，又有人放紫色紙碎花炮，氣氛熱烈。千嬅又再說道，「世界很大，人好渺小，我們要好好活好每一日 ，將好嘢互相分享，希望大家心中可以充滿愛！」歌迷向她大叫「我愛你」，她則幸福笑着開心回應：「多謝你！」

聚會來到最後，大會推出大生日蛋糕，全場亦為千嬅合唱生日歌。

（來源：香港文匯報B08：娛樂 2024/02/05）