麥記咖啡「退休」大反轉　「升級+着數」網民唔收貨

大公文匯全媒體報道，香港麥當勞今早（4日）突然宣布，於今晚6時起停售優質濃香咖啡及優質即磨咖啡，瞬間引爆網絡。不少市民專程趕到麥記歎「最後一杯」作「告別」。不料到下午峰迴路轉，麥當勞在社交平台宣布McCafé咖啡「接棒」，坐實部分網民猜測的「宣傳噱頭」，又指全線麥當勞都會全面升級餐廳咖啡機及咖啡豆，以後無論去到邊間麥當勞餐廳，都有McCafé即磨咖啡歎。

麥記又趁勢推出「着數」安撫大眾情緒，明早（5日）起套餐飲品免費升級至McCafé細杯裝熱即磨黑咖啡；或可以$2優惠價轉配McCafé細杯裝熱即磨白咖啡；或用$5優惠價轉配McCafé Latte細杯裝熱即磨鮮奶咖啡。此外，由明日（5日）起至9月8日一連四日，以早餐試飲價$10就可飲到McCafé Latte熱細杯裝。麥當勞又指，今晚6點後全線250間麥當勞會暫停供應麥當勞咖啡12小時，在此期間會全面升級餐廳咖啡機、咖啡豆及員工訓練，咖啡豆將升級選用100%獲得「雨林聯盟認證」的McCafé咖啡豆，由秘魯、墨西哥及埃塞俄比亞拼配的Cocoa Tazza咖啡豆。

儘管全線升級又推出連串「着數」，網民卻「唔收貨」，狠批「公關災難」。有人直言：「marketing今次真係好差，以為一早咁樣製造話題等大家熱議再推d優惠出嚟，可惜一面倒係反感咗先。」亦有網民「精打細算」指「變相加價」，「加奶加兩蚊」。還有食客對其他餐品提出意見，「可否停售安格斯12小時之後升級番初期質素」。