大公文匯全媒體報道，正所謂行行出狀元，千萬別狗眼看人低！有一名的士司機在社交網站發文分享，日前載了一家三口，目的地是某豪宅，其間富爸爸不斷鬧兒子唔生性、唔上進，話「你一係唔好再讀書喇，去揸的士啦！」，並要求司機幫口講句公道話。沒想到司機卻輕描淡寫地報出自己的收入，頓時令富爸爸為之語塞。帖文一出，旋即引起網民熱議，「揸的士唔一定代表窮」、「自己車的話，其實搵5萬個月真係好簡單」，也有人質疑事件真偽，直指該司機「吹得就吹」。

該名的士司機在「的士司機資訊網 Taxi」發文，表示日前車咗位貴客，跟佢上咗人生寶貴嘅一堂。他憶述，當晚有一家三口上車，目的地是某豪宅，沿途爸爸不停鬧緊個仔，話佢唔生性唔上進，20幾歲一啲成績都無，鬧到咁上下開始苦口婆心，同個仔講，「你一係你唔好再讀書，去揸的士！」兒子反問「揸的士好失禮咩？」富爸爸說：「唔係失禮，不過日日揸10幾個鐘，搵得又唔多，隨時周身病痛，做埋唔夠睇醫生者(啫)！唔信你問下師傅，有得選擇佢會選擇坐辦公室定揸的士？你想住豪宅定劏房？你係唔係一定要做底下層先開心？」並點名司機講到公道說話。

司機猶豫地問富爸爸「真係要我講？」富爸爸堅持道：「係呀！等佢知道社會幾慘！師傅你一個月搵幾多？」司機惟有透露自己月入18萬左右，未計其他入息，富爸爸當堂打咗個突，「揸的士有咁好搵咩？」司機回應「揸的士最多都係搵5萬一個月，其他收入係收租，加加埋埋年薪大概250萬左右，不過同你比較應該差好遠，所以唔敢講！」兒子隨即大爆爸爸年薪都未夠50萬，司機表示「我年薪剩揸的士都70萬喎！」富爸爸仍然不敢相信，「師傅，揸的士有無可能搵5萬一個月呀？」，司機則表示「其實……唔好咁問，有啲7萬一個月大有人在，我都唔敢同人講自己搵幾多」，頓時令富爸爸語塞。

此時，兒子反問爸爸「老豆，咁我讀咁多書仲乜？」司機就插嘴「咁又唔同嘅，邊個做父母都希望自己兒女可以出人頭地啦！讀書始終係好事！」兒子追問司機為何當年不好好讀書，司機解釋「我其實想讀，不過屋企太窮，窮到剩係得返啲錢，又有咁多的士要處理，老豆好早已經要我幫手管理，所以無得讀書」，又稱「見你爸爸勸你讀書好感動，我老豆剩係識比錢我咋，一啲父愛都無。」

然而，富爸爸仍不死心再問司機「師傅，你真係咁有錢仲揸的士做乜？」司機明言「我屋企咁多的士，由細到大都係的士，大把車擺喺度無人揸，咁唔做的士做咩呀？」最終富爸爸轉移話題，「司機前面轉彎入閘呀唔該」，結束對話。