（香港文匯報 記者 梁靜儀）梁家輝為孖女搏盡，最高紀錄一年喪拍13部戲，作品逾140部獲封千面影帝，永不言休。馬時亨主持的訪談式綜藝節目《馬時亨 香港情》，第四集主題是「電影」，邀來偶像梁家輝擔任嘉賓，原來家輝不但演戲一流，「講故仔」能力亦相當高。

屹立影壇四十年的家輝，拍過140多部電影，當年最瘋狂是一日三組戲，一年接拍13部電影，家輝說：「嗰時咩都想試吓，造就咗我有三年時間不斷係咁拍戲，一年拍13部，基本上係冇瞓過。因為每一日要走3組，每組8個鐘，組接組，主要喺組過組嘅時間休息；但香港地方細，過組最多半個鐘頭車。」家輝續指當年這麼賣命，也有部分是為了家人：「因為當年兩個女出咗世，對於一個打工仔係好大開支，所以要不斷接戲嚟維持當時嘅家庭。」

追求不同人生永不言休

談到拍攝需時最長的電影，家輝笑言是《東邪西毒》，並親解該片與喜劇電影《東成西就》千絲萬縷的關聯：「《東邪》本身係兩集，但因為拍咗三年趕唔切交片，就衍生咗《東成西就》，因為嗰時所有東南亞院商都買咗部戲準備做賀歲片，所以唯有焗拍《東成》出嚟應付片商。當時所有華人影迷都好奇怪，點解香港可以出動咁多大明星，走去拍一部咁神怪咁荒誕嘅戲嚟代替《東邪》？可能我哋喺唔知應該點樣嘅絕境入面被壓榨咗三年，所以就掏心挖肺咁將入面最瘋狂嘅一面展現喺觀眾面前，變成後來嘅經典，我覺得呢兩部戲算係我電影生涯好難遇到嘅兩部電影。」家輝指拍戲令他着迷之處，是可以透過角色經歷各式各樣的人生，並表明「永不言休」。

在家輝的140多個人生之中，不得不提他個人的三個代表作，分別是讓他在26歲之齡勇奪金像獎影帝殊榮，成為金像獎史上最年輕影帝的《垂簾聽政》、《監獄風雲》及《情人》；談到當年封帝，家輝謙稱全是導演李翰祥的功勞，並笑指當年新入行的自己完全是跟指示做戲，當年唔係現場收音，咁一action我就行，佢就：「低頭、回頭、看我，再低頭」，真係咁樣拍咗部戲出嚟。家輝又指當年因自己的超爛普通話，令當時已貴為國家一級演員的劉曉慶「反晒面」，二人因「言語」問題多番NG，最後要靠導演以「巧妙的1234567」解決難題，十分有趣。

至於為何能揮低全球眾多強勁對手，爭取《情人》男主角席位，家輝爆笑透露全因自己夠晒Weak，着實令人意外，家輝說：「《情人》個導演係法國人，當時佢走勻全世界搵《情人》入面嘅越南華僑角色，佢喺外國搵極搵唔到，佢嚟到香港，見面第一句就同我講『Oh！you can be my boy』，我問點解，佢就話『You are as weak as I wish！』同埋因為我背脊線條亮麗，又冇乜毛好光滑，當時喺法國都係用『光滑無瑕嘅優美線條』做宣傳。」

而經典電影《監獄風雲》最令人難忘的是當時所有臨時演員都坐過監：「所以我喺現場學到好多嘢，佢哋係會教曉你監獄嘅規矩，人同人相處係點，監獄同出面世界有乜唔同。」

（來源：香港文匯報A17：娛樂 2023/05/15）