稀思路/筆是機場

黑暴運動期間，我哋身處香港，不斷睇到不同地區都出現暴動，筆者試過戴住小朋友出去食飯，都遇着暴徒準備「圍攻」警署；而喺香港之外，我哋又會睇到好多同香港無關嘅外國勢力，不斷為黑暴分子吶喊助威，一時話唔可以掉低香港示威者，一時又話要同香港人「同行」，唔講以為暴動、傷人以至縱火都係合法咁。但如果暴動發生喺外國，係咪都會變成自由嘅一種表現而免罪呢？梗係唔係啦！日前就有新聞，美國極右組織成員，因為有份參與前年1月6日嘅國會山莊暴動，被裁定合謀煽動罪成，據講最高仲可以判監20年。乜美國唔係好自由嘅咩？

經過大約4個月嘅審訊，被指係極右組織「驕傲男孩」嘅前領袖塔里奧同其他3人，就被指試圖喺2021年1月6日，阻止國會認證拜登為美國總統，雖然當日塔里奧唔喺首都華盛頓，但有成員指控佢有份指揮襲擊國會山莊，最後塔里奧等四人合謀煽動罪成立，另外仲有一人嘅相關控罪未有共識，法官指示陪審團繼續商議。

呢單發生喺美國嘅法庭新聞，其實相當值得我哋去「研一研」，正當外國勢力喺度玩大合唱，全力支持攬炒派搞嘅黑暴運動時，其實佢哋所支持嘅，係一場又一場嘅暴動，如果暴動係「無問題」，咁美國一班示威者衝擊國會山莊係咪無做錯？唔係，只係包括美國在內嘅外國勢力，一直都係玩雙重標準，罪案發生喺中國包括香港，如果係反政府活動，佢哋可以支持；但如果罪案發生喺美國以至英國等，其實外國勢力嘅執法部門，執法力度更大，判刑可能咁重，所以，外國勢力支持黑暴，純粹因為政治，與正義、公平同公正都無關係！

筆者仲睇到一點，就係今次國會莊暴動，一名主被告（塔里奧）唔喺事發地方，一樣被判罪成。其實喺香港，終審法院亦曾裁定，推動、鼓勵或促進非法集結或暴動的行為，不論被告人是否身處現場，均可以按「從犯罪行」懲處，香港同美國雖然係唔同嘅司法管轄區，但對於暴動相關罪行都有接近或類似嘅法理；由此可見，美國政客會唔會唔知香港一班暴徒犯緊法？當然都係唔會，佢哋只係基於想打擊中國，而埋沒良心啫！

仲記得黑暴運動最猖狂之時，時任美國眾議院議長佩洛西以「一道美麗的風景線」形容黑暴，如果呢個講法係啱嘅，咁美國國會山莊暴動，又係一條點嘅「風景線」呢？當時，有指佩洛西喺美國國會被困將近5小時，忙住打電話搵救兵，甚至想「打」特朗普。筆者唔知大家相唔相信因果，呢個世界有時就係，你做一件事，例如鼓勵人犯法，他日可能自己都會遇到相似嘅事情，今次美國國會山莊案有人被定罪，筆者唔會話係政治犯，亦唔會話係政治打壓，因為有啲嘢大家都知係犯法同錯嘅，一直只係美國政客雙重標準，間接煽動或鼓勵香港嘅年輕人上街，害咗無數嘅年輕人。