稀思路/筆是機場

武打巨星甄子丹早前接受英媒專訪，當中言論似乎就引起咗攬炒派支持者嘅不滿，因為提及到2019年嘅反修例事件時，甄子丹就直接話係暴動；呢番說話，對大家嚟講可以話係平常不過，但對於「極度敏感」嘅攬炒派支持者而言，就好似好大件事咁，事後，攬炒派支持者紛紛狙擊甄子丹，有人仲聯署要求，要奧斯卡委員會取消甄子丹擔任頒獎嘉賓嘅邀請，聲稱甄子丹支持「打壓人權」。問題嚟喇，甄子丹講嘅係唔係事實？如果係嘅話，會唔會掉返轉，係有人想打壓甄子丹先真呢？

睇傳媒報道，甄子丹嘅說話，實在係正常不過，就提到「反修例事件」時，當時佢身在香港，據佢自己嘅親身經歷，表明「那場不是示威，可以說是一場暴動」，又表示佢唔想政治化，好多人唔鍾意佢講嘅嘢，但佢係根據自己嘅經歷講出嚟；攬炒派支持者向來都係「玻璃心」，所以有人就開始狙擊甄子丹，例如被控暴動而最終脫罪嘅湯偉雄，就喺網上聯署，要奧斯卡委員會取消甄子丹嘅頒獎嘉賓邀請，攬炒派支持者來勢洶洶，其實就係想噤甄子丹聲。

最根本嘅一個問題，就係甄子丹講嘅嘢有冇問題？睇下2019年嘅香港，由6月開始，的確係連場暴動，暴徒打砸搶燒，打警察、襲市民，係鐵一般嘅事實，甚至當時仍未「結業」嘅蘋果日報，都用「衝衝子」嚟形容暴徒，以至用「火魔法師」嚟形容縱火者，甄子丹話「反修例事件」係一場暴動，並無講大話，攬炒派支持者針對佢咩？針對佢講真話？

至於要取消甄子丹喺奧斯卡嘅頒獎邀請，由此亦引伸出一大荒謬，就係因為意見不同，因為甄子丹講真話，所以就要利用群眾壓力打壓甄子丹，筆者想問，攬炒派唔係成日話要講真話咩？原來所謂講真話，就係只能夠講攬炒派支持者啱聽嘅說話？如果係咁，攬炒派支持者實在係太虛偽，而且，攬炒派支持者成日強調言論自由，偏偏佢哋嘅所作所為，就係「只有我有言論自由，政見不同者沒有」，呢種「自由觀」，其實完全係扭曲咗自由嘅真諦。

對於2019年嘅黑暴運動，唔少人都指出過係一場場徹底嘅暴動，甄子丹之所以受到針對，主要出於兩個原因，第一係因為佢係知名藝人，說話有影響力，所以攬炒派支持者更加要攻擊佢；第二，甄子丹今年首度獲委任為港區全國政協委員，攬炒派支持者想「搞」佢，其實亦係一種反特區政府同反中央嘅心理。

如果有人唔認同2019年嘅「反修例事件」係一場場暴動，筆者真係要問，咁呢啲暴力事件係咩呢？和平示威？表達和理非聲音？定係純粹嘅「爭取民主」運動？講真，當時嘅攬炒派，唔少人都表示要「勇武抗爭」，既然表明過係會用暴力、武力反政府，反而介意畀人話係暴動？呢種係咩心理？今時今日，攬炒派支持者仲想玩滅聲、針對，似乎佢哋仲未放下自己嘅盲反思維，仲停留喺反中亂港嘅時代，其實佢哋應該諗下，社會穩定落嚟，佢哋以至身邊人都係受益者；如果仲想香港亂，某程度上，係一種「變態心理」！

（來源：點新聞）