（香港文匯報 記者 梁靜儀）37歲的蔣祖曼（Joman）在近日播映中的無綫劇《輕功》中首當女一，飾演黎耀祥和龔慈恩的女兒，經常要破口大罵「爸爸」黎耀祥，被觀眾指她「不孝」，Joman叫觀眾給她時間去改，又笑稱拍劇那段時間對自己的父母好好。蔣祖曼又透露愛做兼職去了解人生百態，並曾帶兒子送外賣體驗賺錢艱難。

有「獨立電影女王」之稱的蔣祖曼入行廿多年，參演過近20部獨立電影，代表作有《蝴蝶》、《圍城》和《酒徒》等，最近終於在劇集《輕功》擔正女一，飾演黎耀祥（祥哥）的大女兒洪翊嵐，一個好勝、控制慾強、有點看不起爸爸，經常破口大罵爸爸的女兒。Joman解讀洪翊嵐之所以好勝又容易發忟，其實是因為她讀書好，又會思考，相信自己可以將最好的給家人，她的出發點都是為了家人好，只是口硬心軟。現實身為家中幺女的她，自言平日不會這樣對待父母，當知道每場戲都要板起面孔對父母時，她真的有點怯及懷疑真的要這樣去演？祥哥就以過來人身份，一臉嘆息對她說：「仔女真係咁㗎。」 她不諱言拍攝頭幾日，導演都嫌她不夠惡，她一邊看劇本就一邊反思，自己平日與父母的關係及相處態度，是否都曾跟角色一樣？Joman笑說：「拍劇嗰段時間我都對父母好好，之後都盡量提醒自己，任何事都唔好咁忟憎。」

身為兩孩之母的Joman，表示小朋友因要早起返學未能晚晚捧場，但女兒就好落力幫她在學校宣傳，叫同學仔記得晚上九點半收看，最好笑是她的同學仔也是這個時候上床睡覺。問到可擔心女兒將來也會像洪翊嵐般對她？Joman笑稱從小已向子女灌輸，不可以對媽媽態度惡劣，又笑指現實中7歲大的女兒，反而像她的媽媽：「我其實似劇中龔姐（龔慈恩）個角色，為人好烏龍，又經常冇記性漏低嘢，我試過有一次着短褲送個女返學，個女就阿媽口脗同我講：『咁凍，做乜唔着返條長褲呀？』有一次俾個女煩到忍唔住答：『得喇，知喇。』個女就話：『我都係關心你啫！』好搞笑。」

開車入數碼港 迷路兩小時

劇中Joman為了方便監察父母的日常生活，在兩老家中裝鏡頭，她自爆現實中亦曾試過：「小朋友細個時有喺屋企裝過鏡頭，因為個個都有裝，就覺得屋企都需要裝，但裝咗之後一直冇開嚟睇過，直至有一次開鏡頭用個咪講嘢，嚇到佢哋彈起，最好笑係個仔以為一直有開鏡頭睇住佢哋，成日擰轉個鏡頭，但唔知原來可以用手機搖控鏡頭，好豬。」Joman認為不論大小朋友，其實都需要有自己的空間，畢竟兒子都16歲。

首次拍長劇的Joman，為劇集獻出了多個第一次，除了拍古裝戲份，拍揸車戲份對她來說都是一個大考驗：「我雖然有駕駛執照十幾年，但一年揸唔到幾次車，係雪藏牌，加上我又係路癡，拍攝時要記對白又要睇路面情況同埋要遷就機器，所以好緊張，之前試過自己揸車入數碼港，喺裏面兜咗兩個鐘走唔返出來，好似去咗結界。」

被鄰枱茶客 鬧「不孝」

對於劇集收視，Joman並不緊張，反而在意自己的表現：「我本身性格挑剔，每樣事情都想做到最好，有時反而因為緊張鑽牛角尖，事前會緊張自己做得好唔好，中段時緊張自己嘅表現，拍完就驚成品好唔好，一直緊張到播映當日，好彩監製話我OK，唔係只可以演硬淨角色，叫我畀啲信心自己，心情即時安樂好多。」不過她亦預了會有批評的聲音，認為有批評是好事：「善意批評可以令自己進步，惡意批評可令自己堅強，批評係OK嘅，因為人人都有自己的睇法。」她笑言因為角色經常要鬧父母，有一次和「媽咪」龔姐去飲茶，被鄰枱的茶客鬧她「不孝」，她就叫對方給她機會去改變。

Joman中學未畢業便入行，處女作是港台青春偶像劇《Y2K+01》，之後參演過多部獨立電影、電視劇及舞台劇，熱愛演戲的她已視演戲為終身職業，有感人生經歷不多加上性格不是主動進取的人，她又不想讓自己停下來，但又想令自己更好，所以近幾年一直有兼做其他工作了解人生百態，去年就做過好幾份工：「我有做過物理治療中心護士、做過一個月『步兵』送外賣，又有諗過做便利店店員，仲有揸的士，因為真係唔知道幾時可以用得着，而每次返工都睇到好多人生百態。」Joman更趁機與小朋友一起體驗生活，試過一日她帶同兒子一起由大埔搭車去中環送外賣，做足一日只得二百元收入，扣去車費及午餐費用已所剩無幾，讓小朋友知道賺錢不易，而兒子試過之後都辛苦得叫怕怕。

（來源：香港文匯報B05：娛樂 2022/12/28）