（香港文匯報記者 雨航）薑老唔一定辣，做得耐嘅攬炒派區議員都可以害晒整個屋苑。樓齡接近40年、位於港鐵九龍灣車廠上蓋嘅德福花園近日多棟樓宇開展驗樓同修葺工程，但有居民驚見拆棚後樓宇外牆嘅油漆變咗一撻撻，紛紛質問喺當區做咗35年區議員嘅潘任惠珍。潘太近日就出咗篇千字文解畫，話今日嘅局面都係由於身為德福住宅大廈外牆業主嘅港鐵唔肯出資粉飾外牆而起喎。不過，有居民踢爆港鐵早喺2017年已經向潘太講明唔會全面翻新外牆油漆，但潘太同業委會幾年嚟剩係識向居民批評一切都係港鐵嘅錯，完全係有推諉冇建設。面對樓價可能隨時因此下滑，真係可憐呢班業主選個咁嘅區議員囉。

居民踢爆港鐵早講明唔會全面翻新 質疑有人夾硬上馬事後卸責

根據現行嘅強制驗樓計劃，樓齡達30年或以上嘅私樓業主喺接獲屋宇署嘅法定通知後，必須搵註冊承建商進行指定修葺。望住修葺完仍然溶溶爛爛嘅外牆，大批德福花園居民近日就喺潘任惠珍嘅fb留言追問。潘太就「解釋」話，港鐵先至係德福住宅大廈外牆嘅業主。

扮嘢掛橫額 抗議港鐵拒出資

佢話，屋宇署喺2015年都係直接將強制驗樓令寄畀港鐵，而業委會已經早喺約10年前已經就此同港鐵談判。港鐵當時講明自2010年1月1日起承擔德福大廈外牆非結構部分嘅日常開支，並按業權比例

支付外牆嘅相關開支，但港鐵喺2017年就話唔會全面翻髹德福住宅嘅外牆，仲叫啲業主自己夾錢。

佢聲稱港鐵「反口」呢個做法不能接受，所以呢幾年不斷聯同業委會要求港鐵履行「承諾」喎。近日，佢就扮嘢掛起多張橫額，抗議港鐵唔肯出資粉飾，搞到啲牆修葺完後更加肉酸。

街坊紛批潘太馬後炮

唔少街坊見狀都怒斥潘太馬後炮。「Yeon Yeon」就批評：「外牆業權是港鐵，但港鐵不肯油（髹）牆，為什麽（麼）仍要搭棚維修，拆後現在一忽忽油才嘈嘈閉，一開始又不做，真的不知所謂！」「Man Man Wong」就問：「而（𠵱）家先嚟行動早唔早D（啲）？都拆曬（晒）棚。」

「Mervin Hui」就叫潘太拎出港鐵「反口覆舌」嘅證據：「如果有證據，點解唔攞出嚟等街坊同你共同進退？如果冇證據，咪即係推街坊去死？對方又點樣反口覆舌呢？」

「Wing Yee Lam」就問：「簽既（嘅）contract（合約）冇話要油（髹），咁點解會覺得會油（髹）？」潘太嘅回應就非常匪夷所思：「招標時已有油（髹）牆價目，想做就可以立刻加碼。」「Ellen Ellen」就話：「最後落實個份contract係無包呢個item（項目）？咁點解照簽？簽之前一定要傾到包埋架（㗎）啦我assume（認為）？後加item邊個會guaranteed（保證）？」

「Mervin Hui」亦質問：「原來對方冇應承一定全面油（髹），咁何來反口覆舌。請問如果對方就呢點告業委會誹謗，你係咪會將所有官司費用攬上身？」

睇住潘太死撐咗一輪都冇提供實質證據，「Yeon Yeon」就慨嘆：「潘太沒能力處理，一早退位讓賢啦，搞到L座現在都唔知似乜，仲衰過公屋。」「Happy Angel」就話：「私樓一定係甘（咁）啦，全部業主負責，住得私樓交管理費預咗，咁你都有人管理亦都要業委會，區議員幫手把關，但係而（𠵱）家完全係鬧劇一宗。」