（香港文匯報記者 黃書蘭）成世人流流長，總會有做錯嘅時候。知錯，其實最緊要係「能改」，講緊嘅係一個喺前年黑暴期間破壞立法會議員何君堯議辦嘅年輕人。何君堯噚日發帖透露，一位喺前年大肆破壞佢議辦嘅20歲男學生朱沛恒，日前就寫信同佢道歉，佢亦已接納同原諒。唔少網民都覺得「知錯能改，善莫大焉」，仲希望唔少誤入歧途嘅年輕人能珍惜前途，迷途知返。

朱沛恒早前承認刑事毀壞何君堯議辦，被法院判處感化令12個月，律政司其後不滿刑期過輕申請覆核，改判200小時社會服務令。惟律政司仍不滿，再向高院上訴庭申請覆核，案件會喺今日判刑。

何君堯噚日喺facebook上載咗封道歉信，朱沛恒喺信中話：「誠心向你道歉和說對不起，因本人一些幼稚和一時衝動破壞了你的辦公室，對此本人萬分抱歉和內疚，也十分後悔，本人現在已經得到了教訓，已經重新投入社會和重新做人，希望何先生大人有大諒（量），原諒本人，真是萬分對不起。」

何君堯收信後都大方原諒對方：「原諒你少不經事被人誤導犯錯破壞我辦事處。你深切悔悟是對你有幫助，祝願你可以重新振作，做個好而有用的人，將來為社會為大眾做好事！」

網民：應畀次機會

有年輕人坦承道歉、認錯，唔少網民都話應該畀多次機會。「Tse Tony」話：「他是第一個肯正面回應自己所犯過罪行的人，與大部分黄人黑暴性格有明顯區別，雖說有可能是為了減刑而來，但與前面那些上庭時，只有大話連篇，推卸責任求脫罪的手足相比，起碼是肯勇於踏出第一步，即使有求減刑意圖，對其他未判刑或後來者，也起着正面作用，社會應該給予知錯能改的人，一個更生機會，和諧和包容不是香港人一直想擁有的普世價值嗎？亦感謝何議員亦有量度，寛（寬）恕其所犯罪行。善哉。」

「CoCo Suen」就話：「就只想他們知錯，不要執迷不悔， 我相信好多人同我哋同一諗法！打爛嘅係死物，破壞嘅係人心，多謝何議員心（深）明大意（義）。」

「大軍」都話：「認錯最勇敢，寬恕最有福。」「Franky Lui」話：「錯而能改，非常好，也祝這位青年有美好的將來。」「Pearl Tang」就話：「依（）位年輕人有悔過要比（畀）一個（讚），悔過後能夠企起身道歉承擔更值得比（畀）2個（讚）。」

有網民就期望迷途嘅年輕人都能借鑑反思。「Wong Chin Fung」話：「其實上天待佢不薄 la（喇），未鑄成大錯已經識得醒覺回頭，希望正如何律師所講咁改過以後，佢可以為社會同大眾做多D（啲）好事，亦可藉自己嘅經歷勸誡其他年輕人……」「Karine Wong」就話：「年青（輕）人要珍惜自己，唔好令家人擔心。」

有網民就提提年輕人要拒絕仇恨。「Newsky Chow」話：「其實要香港繼續向前行是需要大愛，政府應準備特設的更生計劃給坐監服刑後知錯的年輕人。」