（香港文匯報記者 倪思言）黃絲睇嘢嘅標準，即係冇標準。「熱血公民」主席鄭松泰（蟲泰）之前因為食咗個美心蛋糕而俾班黃絲鬧到七彩，當時蟲泰就反串班黃絲不可理喻，噚日佢又主動挑機，轉發咗《蘋果日報》宣傳美心戶外BBQ場嘅報道打啲黃絲面，揶揄話：「撐蘋果，食美心！……如果唔係蘋果都唔知開咗呢間嘢。」但啲黃絲點會認衰，仲幫蘋果解畫話佢哋報道宣傳係為咗暗示大家唔好去食喎！

蟲泰出帖寸盡《蘋果》

黃絲嘅心頭好《蘋果日報》日前幫美心賣廣告，推介佢旗下嘅戶外BBQ場，大讚食物有驚喜、地方又整潔。成日俾黃絲同路人雙標針對嘅蟲泰立即抓住時機，噚日就轉發《蘋果日報》個報道，仲陰陽怪氣咁話：「撐《蘋果》，食美心！都OK近我，如果唔係《蘋果》都唔知開咗呢間嘢。」仲要攞出蘋果條美心戶外BBQ場報道片，片尾嘅一個寫住「自由……我們不會認命！」嘅畫面諷刺佢哋。

黃絲果然冇令蟲泰失望，個個爭住鬧佢。「Damon Lau」就話：「知道係美心梗（更）加唔會去，橫掂你咁得閒𢭃住政府人工㩒下（吓）掣仔，多啲話畀市民大眾知邊啲唔好去喇！當刷下存在感都好嘛。」但亦有人就同蟲泰企埋一邊，身為「熱狗」嘅插畫家「阿柱」就揶揄：「松泰食美心可恥，蘋果賣美心Okay。」

「Jeff Arlo Jef」亦話：「成日笑你食美心嗰啲黃C唔係好鍾意《蘋果日報》嘅咩？點解《蘋果日報》會幫美心賣廣告㗎？哎呀咁啲黃C點算？」「Morty Smith」仲揶揄班成日上綱上線嘅黃絲：「今日係民主最黑暗的一天。」「Joe Yue」就恥笑：「真係慘，黃C又hang機。」

但做得黃絲硬係死剩把口？「Chun Kei Chang」就反駁：「咁你買起蘋果佢囉，你養得起蘋果所有員工咪可以唔駛（使）接廣告囉。」「Raymond Kwong」更誇張：「蘋果報le（呢）個場係美心，暗示黃絲唔好去食咋。」真係知黃絲標準多，唔知佢哋內心戲都咁多呢。