首次參加英皇新春團拜　歐陽震華：首半年工作好刺激

（大公文匯全媒體 特約記者 陳惠芳）英皇娛樂昨晚（6日）舉行新春團拜晚宴，集團主席楊受成率領旗下藝人包括：泳兒（Vincy）、歐陽震華、女團VIVA、周家怡、溫碧霞（Irene）、陳國邦、楊天宇（Angus）、曾傲棐（Arvin）等出席，加上霍汶希（Mani）助陣，氣氛熱鬧。

英皇電影去年開拍的《破·地獄》大收一億六千多萬，成香港史上最強電影，老闆楊博士眼光獨到，更即場舉行抽獎環節，氣氛熱鬧。而去年簽約英皇娛樂的歐陽震華，首次參加公司的新春團拜。

歐陽震華說：「好開心，喺TVB好似冇呢個環節，團拜就有，但一齊食飯就冇。」他指最興奮的是入了新公司後，做了一些他從沒做過的事，「第一年入公司，舊年六月開始到而家過咗半年，刺激嘅係我做咗啲以前咁多年都冇做過、或者冇人搵我做過、甚至係自己冇諗過我會做到嘅事。」他口中所說的是參與了內地歌唱節目《聲生不息》，「初初我都覺得好似唔好關我事，呢個節目唱歌嘅個個都係樂壇天花板，但公司話關我事，因為嗰一集係講港劇主題曲，我實在拍了太多港劇，適合身份我唱」。他坦然當時十分緊張，「我怕失禮公司、失禮香港演員。一唱完我問公司同事有冇走音，佢哋話冇，我唱歌冇乜嘢技巧，只係真心演繹一首歌俾觀眾聽。」至於蛇年願望，他希望大家都身體健康，日日都開開心心，最重要是沒疾病沒戰爭。

今次領軍當起大師姐的Vincy則說：「我今年比較主動，即刻衝出去派利是，同埋我屬狗，今年行運！哈哈。」日前推出新歌《無糖可樂》的Vincy，在團拜晚宴上全程用「無糖可樂」祝酒，趁機宣傳新歌。