未婚妻王青霞明年7月獲釋　李龍基：擇吉日結婚

大公文匯全媒體報道，現年73歲李龍基的36歲未婚妻王青霞（Chris）被控逾期居留、使用虛假文書及違反逗留期間接受工作等共7罪，被裁定5項罪成，合共判監25個月。李隆基今日（3日）出席活動接受訪問時，談到未婚妻Chris將於明年7月7日出獄，他會畀時間對方扮靚靚，之後就會擇吉日與Chris結婚，還會邀請親友出席分享喜悅。

被問到Chris於明年7月7日獲釋一事，李龍基表示：「我會喺深圳嗰度接佢，暫時嚟講可以話係安排好晒，等佢出嚟之後重新去生活，希望有個美好嘅將來。（會唔會以後生活重心放喺深圳？）暫時佢係落唔到嚟嘅，一定要改變佢嘅身份，我會盡快同佢去註冊結婚，咁佢用李龍基太太呢個名義呢，我就可以幫佢申請落嚟（香港）。咁變咗個身份就唔同好多喇，差好遠。（有無話擇咗邊日？請親戚好友？）未擇日，但係已經有好多朋友話要去深圳嚟同我祝賀，我好開心。到時我唔會話點樣大搞，我哋會好低調，唔使封禮，我請就得。（一出嚟即刻去註冊結婚？）我迷信少少，都係要搵人擇日。」李龍基直指女為悅己者容，一定會讓Chris扮靚靚去結婚，至於家居方面，他稱Chris在佛山有層千幾呎的樓，住屋不是問題。