港姐2024｜鍾翠詩參選有包袱爆喊　馮盈盈罕露素顏

（大公文匯全媒體 特約記者 陳惠芳）港姐特備節目《2024香港小姐女·遊記》今晚（27日）播出塞班之旅，馮盈盈、麥美恩（Mayanne）帶領7號秦冀雯Yvonne、8號盧凱怡Kerry和12號鍾翠詩Tracy玩轉塞班。

五人兵分兩路，麥美恩和盧凱怡體驗自駕小型飛機，馮盈盈則和秦冀雯、鍾翠詩去到藍洞浮潛。盧凱怡自駕小型飛機玩得十分盡興，起飛後全程由她控制小型飛機，她笑言：「我覺得揸飛機幾易，因為又冇燈，又冇塞車！我有新目標，我要買一架飛機！」對於盧凱怡的駕駛技術，同行的機師給予9分高分。

另邊廂，馮盈盈、秦冀雯和鍾翠詩化身美人魚影靚相，雖然畫面唯美，但鏡頭後秦冀雯卻頻嗌想嘔，她說：「血氧唔係好充足，搞到低血壓，全程好想嘔。」另一焦點落在馮盈盈身上，浮潛完後素顏樣終極曝光的她，呻爆被製作組「賣豬仔」，盈盈高呼：「原來唔使化妝過嚟，因為上到水之後變到好似素顏咁，早知就唔嚟啦！」場面搞笑。

之後一行人出海玩水上降落傘，秦冀雯和盧凱怡，馮盈盈和鍾翠詩分成兩組比拚，期間兩組更要背誦歷屆港姐冠軍名字。該環節最大亮點不是佳麗和盈盈在高空嗌到拆天，而是坐在快艇上食花生的麥美恩，皆因她被自稱是其「老公」的船伕狂撩，更親手送上定情手環，認真好艷遇。

今次行程感觸良多，三位佳麗在營火會坦露心聲，齊齊淚腺失陷爆喊收場，當中鍾翠詩坦言因「華姐」包袱搞到壓力爆煲：「我覺得自己好冇自信，大家覺得我係華姐，講嘢又好似好官腔，我自己又好驚講錯嘢，好大壓力……」