「餓」足8年再登紅館　郭富城期待再創新高

香港文匯報報道，郭富城（Aaron）日前作客TVB娛樂新聞台節目《StarTalk》，接受主播許文軒專訪，大談即將舉行紅館演唱會感受。Aaron說：「8年前開過紅館演唱會，做完之後，其實覺得都要隔一段時間先再做，最低限度4年。中間一直都係電影產量比較多，估唔到4年又4年，要隔8年先再做，原來8年都係一個幾長嘅時間！（係咪餓咗好耐？）餓？直頭饑荒，因為每次喺紅館做演唱會都會推到個人去到最高點，好期待今次企喺紅館上，看看可以將自己推到有幾高！」

談到如何為個唱作準備？他說：「今次差唔多全部舞蹈都係新，自己都好期待！喺我嘅團隊當中，有好多舞蹈員跟咗我好耐，有啲結埋婚，但係依然對跳舞有熱誠，今次加咗啲新嘅舞蹈員、年輕嘅舞蹈員，可以新舊融合，大家一齊交流，而且今次又有美國嘅排舞師來幫手，協助同提升佢哋嘅舞蹈同技術。（培育女兒跳舞？）佢已經有我嘅因子，自動波！佢哋兩三歲嘅時候已經上芭蕾舞堂，亦有學唱歌！不過我會讓佢哋自由發展，我唔係一個專制嘅爸爸，佢哋鍾意就畀佢哋試。同埋我已經教定佢《想見便遇見》呢首歌嘅小動作。」

Aaron又說：「咁多年嚟，自己都好好控制飲食，平時都已經On Diet，尤其現在成為爸爸，間唔中好似放假都要帶小朋友出去食飯，佢哋好期待，我覺得作為爸爸係應該。（以前好鍾意打邊爐？）現在好少，呢7年通常都喺屋企食飯多，因為自己係一個Family Man，人生改變咗好多。」

（來源：香港文匯報B08：娛樂 2024/08/09）