（香港文匯報記者 劉明）香港的士司機服務素質參差，香港文匯報記者昨日在尖沙咀廣東道直擊被的士拒載的乘客之中，既有旅客，還有不少市民。有巿民表示，不止一次因路程短而被的士拒載，對出行構成不便，更曾遭司機兜路，多收五成車資，向司機質問亦未獲理會。截的士截到一肚氣，有巿民表示多次遭到的士司機兜路和嫌路程短後，「唔想繼續受氣，從此不再截街車，改為乘搭網約車。」多數市民都期望特區政府發出的士車隊牌照，以及規管網約白牌車後，為的士業引入競爭從而提升服務。
香港文匯報記者昨日在尖沙咀廣東道直擊市民張先生被的士拒載。他向記者表示，欲搭的士返回大角咀住所，走到一架停泊路邊的的士時，司機突然「冚旗」（豎起「停止載客」牌子）並表明不載客，「搭的士前與朋友在路邊傾偈，朋友當時睇到的士未有冚旗，但走到的士旁想拉車門時，就見到佢冚咗旗。」事實上，香港文匯報記者在現場觀察，該輛的士時而冚旗，時而起旗，疑似專揀路程長的乘客接載。
質疑兜路 不獲理睬
張先生表示，以往亦不止一次遭拒載，「唔係好多次，但都佔一部分……（我）開車門（司機）問去邊？譬如尖沙咀去大角咀，好短嘅路程都唔接，司機多數話『幾步路咋喎！』好似喺度反問『咁短路程都搭的士？』」他直言只揀長途客的拒載行為會影響香港形象，以及影響市民出入。「人家（遊客）都唔知你乜事拒載唔去，佢又唔識路去，咁點算呢？！」
除被拒載外，他亦曾搭的士由公主道返回大角咀時，最直接路徑理應是轉入亞皆老街，但司機兜路多收車資，他指回家車資一般為60多元，但那次多收五成，盛惠90多元，「我問司機點解價錢差咁遠，相差10元以內都可以接受，相差30元就好明顯，我問佢（司機）但佢無理我，最後都要畀錢嘅。」
對於特區政府會發的士車隊牌照，他期望的士服務日後有所改善，至於白牌車會否合法化，他以乘客角度認為有競爭自然有進步，「不過最緊要係安全問題，如果政府做好啲政策，確保發牌予合資格的司機就無問題。」
嫌路程短 說話難聽
家住上環荷李活道的Jack同樣因為搭的士多次受氣，「有次去澳門公幹，去到港澳碼頭先發現帶漏嘢，要趕返屋企攞，所以喺港澳碼頭的士站跳上的士返荷李活道，司機似乎好唔滿意路程短，同其他司機通話時『單單打打』，話排咗咁耐隊，點知先做27蚊嘅生意。我知車錢少，但唔趕時間都唔使搭的士啦！」
另外，他曾在晚上由灣仔工作地點搭的士回家，「上車時已話咗畀司機聽目的地，車資一般為50幾元，司機結果經皇后街由荷李活道上段上去，好似跳多三次錶，即要多畀6元。雖然唔係大數目，但明顯係兜路。我問佢（司機）點解要行遠啲，佢唔知真傻定扮懵，話一時分心行錯咗，最後死死氣地收我畀開嘅價錢。」
他自此不再在街上截的士，改為搭網約車，「司機知道你去邊，路程有幾遠，啱路願意接單先嚟車我，唔使再聽諷刺嘅說話，亦唔會再兜路。」他亦期望政府發出的士車隊牌照和規管網約車服務後，市民有更多更好的交通選擇。
（來源：香港文匯報A02：要聞 2024/06/07）
