夫妻關係差為小朋友欲移民　港爸呻「到底離婚定移民好？」

大公文匯全媒體報道，移民定離婚是近年不少家庭面對的課題。有港爸近日就在網上社交平台發文，大呻「我到底離婚定移民好？」，指同老婆關係好差，但為了小朋友有意移民，只不過就無錢，得層300萬的樓，仲要蝕緊，兼且未供完喎。他慨嘆「移民係想下一代好，唔移民係因為仲有家人放唔低」。

該名港爸在fb群組「英國香港人生活交流區」發文稱，「人到中年4X，發現有時做人好難，有小朋友後同另一半關係好差，但為咗小朋友忍住唔離婚。」然而，他為了小朋友打算移民，但指自己無錢，「層樓賤賣又唔夠錢，得嗰HK$300萬」，而且現時蝕緊樓價，亦未供完，又擔心唔賣將來要交稅。樓主提到生活有壓力，「唔移民，另一半又覺得人生無晒希望咁，日日見到佢個愁樣，我都好抑鬱」，他慨嘆「移民係想下一代好，唔移民係因為仲有家人放唔低」，遂問網民到底離婚定移民好喎。

有網民質疑「三百萬叫無錢？」、「香港人就慣咗有幾多錢都覺得自己好窮」、「我樓都無得賣都迫我老公移民啦，你係為自己舒適定為小朋友將來先？」港爸就為自己辯解，稱「我300萬講緊上個月樓價，仲未供完，係已經蝕緊，變賣所有嘢為150萬元」，直指「睇樓價咋，但而家都唔知賣唔賣得出」。至於夫妻間的感情，他坦言「婚姻得番個小朋友維持，所以無希望婚姻有咩轉機，只係擔心過到去我哋畀唔到小朋友啲咩，又唔係學識高，搵到工都唔知夠唔夠生活費」。

有網民則奉勸港爸三思，「不如你諗下原本想唔想民為主好過」；有網民認為「其實40歲$300萬仲要有小朋友真唔多，要帶住小朋友移民唔熟路真係唔夠，除非佢本身high profile job香港公司可以transfer佢嚟英國，本身又有喺英國住過咁可能都ok」。