（香港文匯報 記者 阿祖）陳奕迅（Eason）用了一個多月在北美巡演，創下首個華人歌手於北美Arena開6場演唱會的紀錄，並且是首位踏足三藩市Chase Center開騷的亞洲歌手， Chase Center更特別為他訂做一件刻上他演出年月日的 FEAR AND DREAMS黑色外套作紀念。
Eason由8月27日飛抵紐約，花上一個月時間到過多倫多、芝加哥、洛杉磯、三藩市及溫哥華共演出6場《 FEAR AND DREAMS 世界巡迴演唱會—北美站》，近7萬名觀眾看過他的演出，創下驕人成績。完成6站演出，Eason謂每一站也很難忘，過去巡迴演出會很趕，馬不停蹄唱完一個地方再飛到另一個地方，中間是沒有什麼休息時間，但今次去了一個月，只唱了6晚，當中他有時間好好休息保護聲帶，又可以感受當地城市風景，及與不少在北美生活的老朋友見面，所以都幾開心。而第一次帶過百人的團隊一起北美巡演，他倍感自豪， 也答謝團隊為他付出，不單止開工，更要留在北美一整個月，又要去玩和花錢。
網傳Eason溫哥華門票賣得不是很好，Eason於溫哥華舞台上望着全場爆滿的觀眾笑道：「好多謝你哋，之前話溫哥華啲飛係賣得最差，但係現在又唔係好覺喎，咪又滿晒，幾好嘢喎你哋！畀多啲掌聲大家！我知啦，係你哋慢，聽講你哋係慣咗買飛買得好慢，我差啲諗住咁不如取消咗佢啦。來到溫哥華我知啦，我嚟到都唔係好想做嘢，啲天氣又落吓雨咁，個人只係想唔做嘢， 行步路都慢，哈哈。」他又跟觀眾開玩笑說：「咁慢！呢次可能係我最後一次嚟啦！」觀眾大叫歡呼：「唔好呀，一定要再嚟呀！唔好走啦！」令Eason爆笑。
預告相隔5年將出碟
因為溫哥華是北美的尾場，所以安歌時他唱了3首歌，令觀眾十分開心，而5年沒有出唱片的他向觀眾預告：「我就快出碟啦！錄咗好耐啦，隻碟同Fear and Dreams好有關係，好希望隻碟可以帶到力量畀大家，喺大家經歷過好多唔好嘅事、壓力同驚恐之後，可以一齊停一停，放鬆呼一口氣， 抬頭再望，原來仲有路可以繼續行，幾時出稍後會公布。」
演出結束之後， Eason留在溫哥華過中秋，跟當地好朋友敘舊，他表示：「祝大家中秋節快樂呀！唱完溫哥華就唔落雨，天氣好好，我出咗去享受吓城市氣氛，當地真係好多老朋友，所以就留多兩日大家一齊過節開心吓，之後返到香港就要收拾心情，為10月澳門9場演唱會做準備啦。」
（來源：香港文匯報B07：娛樂 2023/09/30）
