稀思路/筆是機場
喺筆者中學年代，好多男仔都鍾意玩一隻電子遊戲，遊戲叫《生化危機》，遊戲玩咩？就係打喪屍，呢隻遊戲受歡迎嘅程度，係出完一集又一集，再出一集又一集；遊戲好玩之處，係佢可以畀到遊戲者喺現實世界唔會有嘅體驗。現實無喪屍，呢一點大家都知道，不過最近，美國費城就出現「街頭喪屍」，原來當地有人吸食新型毒品，食到好似「喪屍」喺街遊走咁。呢啲美國嘅新聞，再次令我哋見識到「自由社會」嘅副作用。
真係唔睇新聞都唔知，一睇就長知識，美國費城有人服用俗稱「喪屍藥」（Zombie Drug）嘅「甲苯噻嗪」（Xylazine），呢種本來用喺大型動物身上嘅鎮靜劑，被吸毒者用嚟增強海洛英、可卡因同芬太尼嘅效果，結果，就係好多人吸食完之後神情空洞，身上更有明顯嘅潰瘍傷口，甚至有人倒斃街頭，所以費城就出現咗「喪屍」周街走嘅亂象。
今次新聞嘅事發地點，係費城嘅一個區，但其實美國有一個城市或者地區係咁，其他城市一樣可以。2020年，美國有近6000萬名12歲以上嘅美國人濫用毒品或藥物，大部分都係吸食大麻；2021年，就有超過10萬名美國人死於過量吸毒。之前有業內人士估計，美國大麻市場喺2030年將達到650億美元，即係話，唔理佢係咪合法化咗，喺美國，毒品市場根本就係一單又一單「大生意」。
美國吸毒問題嚴重，其中嘅底蘊，筆者覺得，係同佢哋嘅自由風氣有好大關係，喺西方嘅價值觀，有啲理論支持適度嘅自由，一啲理論家，就追求一種近乎係至高無上、不可侵犯嘅自由，「只要我無傷害人，我咁做有何不可？」，筆者想講，呢種思想，係美國今日內亂、撕裂嘅原因，有啲人可能對美國夢趨之若騖，但如果去到美國呢啲地方，連基本安全都得唔到保障，呢種夢有幾值得嚮往呢？
有報章喺報道事件時，就指出費城係《獨立宣言》嘅簽署地，喺美國歷史有好重要嘅地位。喺《獨立宣言》，開頭有一段講「人人生而平等，造物者賦予他們若干不可剝奪的權利，其中包括生命權、自由權和追求幸福的權利」，唔知喺部分美國人而言，吸毒係咪自由嘅體現？令到自己短暫得到快感，又算唔算係「追求幸福的權利」？筆者唔敢判斷，美國社會係咪已經搖搖欲墜，但可以肯定嘅一點，就係美國引以為傲嘅制度，其實唔係咁值得去宣揚，因為「美式自由民主」，有時會讓人「花式自殺」。
