稀思路/筆是機場
2013年6月，美國國家安全局（NSA）前僱員斯諾登踢爆「稜鏡計劃」，揭露美國原來一直喺全球大範圍監控、監聽，甚至連德國前總理都唔放過，事件喺全球引起軒然大波，因為斯諾登當時曾身處香港，所以呢件事喺香港亦引起高度關注。正當大家以為美國「衰過一次」，斷估都唔敢再監控、監聽嘅時候，最近美國空軍國民警衛隊士兵特謝拉喺網上分享美國嘅機密信息，原來美國仲持續監控多個國家，包括以色列、韓國、烏克蘭等。其實盟友，即係大家有結盟，大家相信大家，如果美國連盟友都唔放過，咁佢嘅盟友當佢係「盟友」，係咪好愚蠢呢？
睇返美國近十年嘅紀錄，真係非常之差！2013年，先有斯諾登踢爆嘅「稜鏡計劃」。2021年5月，有媒體踢爆美國喺2012年至2014年間，監聽德國、法國、挪威、瑞典等國政要短訊同電話通話內容；其實喺2015年，「維基解密」就爆料，指美國國家安全局曾經監聽過幾位法國總統，當時嘅德國總理默克爾都可能有份。從簡單嘅角度睇，美國一係就信唔過自己盟友，一係就想控制自己盟友。
今次又係由美國製造嘅「竊聽風雲」，其中一受害者韓國，其總統尹錫悅似乎唔係好憤怒，甚至連半句批評美國嘅說話都唔見有，正當韓國傳媒以至民間都怒斥美國時，尹錫悅就堅稱 「韓美信任是堅定的」，呢種做法，都幾「息事寧人」。從國際關係嘅角度睇，韓國因為要靠美國，所以政府唔敢出太多聲；從我哋呢啲正常人嘅角度睇，美國嘅霸凌行為，除咗係用於競爭對手外，對住「自己人」美國一樣欺負，做佢盟友都咪話唔慘！
唔知點解，睇到美國又再監控其他國家嘅新聞，筆者就好自然咁諗起TikTok，美國有地方政府已經開始封殺TikTok，可能唔畀市民透過手機嘅「應用商店」下載TikTok，原因係TikTok可能會將資料傳送畀中國政府；但係呢，美國聯邦以至地方政府，其實係無證據證明TikTok會咁做，只係用上「可能」、「可以」等字眼，就開始想封殺TikTok，但依家美國一而再、再而三咁監控其他國家甚至係盟國嘅領導人，點解大家又可以當無件事呢？即係玩「誰大誰惡誰正確」？美國嘅做法，唔單止橫蠻無理，甚至已經去到一個地步，就係不論是否盟友，全球都要「唯美國獨尊」。
正當各方喺度觀察緊美國到底會點處理呢件事，筆者想講，美國嘅做法好簡單，就係解決揭露問題嘅人。涉及今次事件嘅特謝拉，已經因為涉嫌違反《間諜法》而被捕，隨住一直調查，特謝拉好可能會面臨更多甚至更嚴重嘅控罪；美國做法令人「毫不驚訝」，因為10年前斯諾登踢爆美國嘅陰謀時，美國都係想用盡一切方法將斯諾證捉回美國受審。喺國際政治，唔合理嘅事發生一次，一啲國家唔出聲；發生第二、第三次，受害國家又唔出聲，美國擺明以大欺小而無人去反對同抵抗佢，咁美國政府見到監控「冇問題」，梗係會繼續落去啦！做美國盟友，真係有辱無榮！
