《最後禮物》遲半年演出　楊受成感謝觀眾零退票

（大公文匯全媒體特約記者 陳惠芳）由黃子華及潘燦良主演的舞台劇《最後禮物》，因疫情而延至昨晚（22日）首演。出品人楊受成於完場後罕有上台致謝。

楊受成多謝該劇的台前幕後以及觀眾在這段時間耐心等待，他說：「6個月後做呢個舞台劇，做得非常好，多謝佢哋。我要多謝觀眾同埋嚟緊39場嘅觀眾，我聽講當日決定停之後出通告，觀眾可以退飛，但退飛嘅人差唔多係零。」  

黃子華則先多謝出品人楊受成，他說：「呢個騷停嘅六個月，中間好多騷停咗就冇咗，好陰公，要好有實力嘅人先可以安排做返咁多場。」子華又笑指在排練初期，拍檔潘燦良已向他表示演這部戲好勞氣，健康差點亦做不到：「導演又激死，因為我哋成日問好多問題，總之成個團隊合作好愉快，好感恩能夠有呢次機會，亦感恩大家冇走到，多謝！」  

此外，蘇永康與太太馮翠珊（Anita）、毛舜筠昨晚專誠捧場。蘇永康指，曾經在2009年獲新加坡政府邀請，參與杜國威撰寫的《上海之夜》音樂劇，問到是否想再演時，他說：「要夾啱人，因為舞台劇係表演藝術中最難」，而他最想與陳潔儀合作。   

毛舜筠（毛姐）自爆因跳繩拉傷左腳：「我之前去咗加拿大幾個月，一直都冇做運動，最近癮起再做，我每日跳1000下跳繩，可能太耐冇做所以就拉傷左腳嘅筋踺。」雖然腳部受傷，但毛姐就沒有去看醫生：「因為我囡囡係讀物理治療，仲有兩年畢業，佢話我唔駛睇醫生，只需要呢兩星期唔好做運動同行少啲，我盡量啦！」