（大公報記者 蘇荣、盧剛昌）荔枝角工廠區有一間兩餸飯食店，店裏的飯菜沒有味精，而是滿滿的人情味，盛載着人與人之間的關懐與溫暖。
身兼廚師的食店負責人亮仔，2020年搬到荔枝角青山道開始經營自家生意。眼看附近一間長期免費派飯給長者的店舖因經濟問題結業，亮仔二話不說肩負起這個愛心使命，接力行善，每日派發200個飯盒給有需要的市民，「既然我有呢個能力，就盡力去做！」
下午3時左右，在青山道和光昌街交界的轉角位，排滿了過百位公公婆婆，有的會三五成群圍在一起閒聊，有的目光專注地看着一間食店，他們排隊等待的，其實是一個飯盒。
在隊伍中的李女士對大公報記者說：「我差唔多每日都嚟，星期日唔派就唔嚟囉！有時都攞唔到，好似今日咁多人，就未必攞得到。我哋呢啲老人家，又去街市買餸，又要煮，又要洗碗，梗係辛苦啦！而家煮飯煮得好慢，以前後生煮餐飯一個鐘，而家起碼兩個鐘頭，我嚟呢度攞咗盒飯，食完就可以休息，真係好大幫忙㗎！」
「我都算係有能力自己搵到兩餐，但係有啲人真係連呢個能力都無，能力做到嘅，唔算得係啲咩！」
亮仔的店原本叫「亮仔外賣速遞專門店」，2020年底由只做外賣的細舖，搬到青山道變成近800平方呎的「亮仔食堂」，除了可兼營堂食多賺一份錢之外，還多了一個愛心任務。
「我係亮仔，今年38歲，係『亮仔食堂』嘅負責人。」亮仔10年前在永康街開設一間小外賣店，前年雖然疫情嚴峻，但他看準工廠區的需求，決心搬到比舊舖大了幾倍可兼營堂食的青山道地舖，更把店名改為「亮仔食堂」。「呢一區絕對有兩餸飯嘅需要，加上我哋做啲平靚正嘅食物，就算喺工廠區都一定有生存空間。」
開業半年後，亮仔接到一個愛心任務，雖然未能令食店的生意額大增，但亮仔只考慮了一會兒便馬上答應了。「附近有一間舖頭做開派飯，但佢哋決定唔再經營，要執笠，負責人過嚟問我哋有無興趣延續落去，講真佢哋其實可以一走了之，直接關門唔需要理班公公婆婆，但係佢都想盡能力去幫班公公婆婆安排後路，既然我有呢個能力，就盡力去做，一口應承咗。」
「最難忘有人無着鞋，仲有啲坐住輪椅，好明顯係特別需要幫助，所以我唔需要佢哋排隊就會畀飯佢哋。」
免費派飯活動由去年9月開始，除了星期日，每天都會派，每日都會準備200個飯盒給有需要的市民。「我哋煮嘅都係素菜、齋菜為主，所以支出唔算好多，成本唔會好高。我都算係有能力自己搵到兩餐，但係有啲人真係連呢個能力都無，既然我都算容易得到，就派啲出去，能力做到嘅，唔算得係啲咩嘅！」為節省成本，亮仔的媽媽、妹妹和妻子每天都會到舖頭幫忙。
至今已派出3萬多個免費飯盒的亮仔，最難忘是那些一眼望去就知道是需要幫助的人。「曾經有人無着鞋，仲有啲坐住輪椅，傷殘嘅人，嗰啲好明顯係特別需要，所以我唔需要佢哋排隊就會畀飯佢哋。當中都有啲比較後生嘅嚟攞飯，不過都講緊係50歲左右，叫做相對後生，始終未算係老年人，都有呢啲人嚟攞飯，不過只要佢哋有需要，有排隊，我哋都會派畀佢。」
由答應派飯當日開始，亮仔從沒想過回報，亦不曾大肆宣傳，始終做善事只求心安理得。但收到愛心飯盒的人又豈會毫無謝意？亮仔曾經收過感謝卡和生果作回禮。「有街坊有時會攞幾個蘋果、橙送畀我哋食，聖誕節我哋都有收到禮物，有幾次我哋都會叫佢哋攞返去自己食。早排收到一張感謝卡真係好難忘，雖然派飯係本住良心去幫人，但原來每一次見到佢哋攞到飯盒嘅眼神，仲有佢哋專登寫畀我哋嘅感謝卡，係會好有感觸。所以無論疫情之後點樣，我都會繼續派落去，做到嘅都會做。」
（來源：大公報A6：港聞 2022/04/26）
