日前社交平台熱傳一位確診患者的親身經歷，引起網民共鳴。以下節選該名患者自述：
「大家好，我係於1月26日確診新冠肺炎，並現已出院自我監察14日。由於疫情嚴峻，想同大家分享初期嘅病徵，同埋向剛確診嘅同事分享康復嘅歷程，希望幫到大家。初期病徵：1. 低燒(我就係38.3以下)；2. 攰，好似感冒咁特別想瞓覺；3. 少少發冷；4. 關節肌肉酸軟。中後期病徵 (初期病徵好快已經無晒)：1. 咳嗽；2. 有痰。由於初期嘅病徵真係唔明顯，所以如果大家只要有少少唔舒服，或者覺得自己有機會感染，真係唔好嫌麻煩要去檢測幾次。由我後來追溯返相信係感染嘅當日，直至收到確診期間，都檢測咗第4次先係初步陽性，因此切勿掉以輕心。」
該名患者告誡確診但未送院，尚留家觀察的民眾：「呢段時間好重要，因為你嘅屋企人可能未染疫，除咗任何時候都戴口罩同獨立留係房之外，如果屋企有空氣清新機可以放入房，真係會有幫助。我確診前我部空氣清新機一直以來都係放睡房，即使我同我太太係一直同房瞓，佢都無確診。至於同事及家人隔離方面，政策及措施經常會變，所以我不便多講，只可以話一齊食過飯嘅都會係密切接觸者。」
「送院方面，救護員都疲於奔命，救護車無咁快會到，我等咗兩晚先有救護車接走，所以大家都要畀啲耐性，盡量留房休息。至於『走佬袋』方面，基本上都係帶一般入院嘅物資。」患者提醒大家帶足個人必需品，他列出自己的清單﹕「充電線、後備插頭、內衣褲 (唔洗帶咁多外衣褲，會有病人衫褲同病人褸提供)、乾糧、拖鞋、沖涼液、洗頭水 (HKICC可以提供，不過數量有限)、盒裝紙巾、濕紙巾、耳機 / Headphone、個人娛樂物品、消毒用品(噴霧)及後備口罩 (HKICC每日會提供1-2個普通口罩)、毛巾 (HKICC都會提供)、保溫杯。」
「住院方面，我就係入住HKICC（北大嶼山醫院香港感染控制中心），我間房就有6張床位同共用浴室廁所，床與床之間有拉幕分隔，空間都算寬敞，而床頭有USB & PD充電插頭位，同埋三腳插頭位可供使用。病房布局基本上同醫院一樣。住院期間，每日要於早上和黃昏喺房內自行量度及upload體溫、血氧同血壓，到時會有廣播提你。而醫生都會每日見你，多數係透過病房內嘅平板同你視像，跟進病情。我當時就隔日檢測，當Ct值上到3字頭時就每日檢測。至於治療方面係靠你自己抵抗力同產生抗體，唔會有咩特別嘅藥會派，醫生最多開止咳水同化痰素等等嘅藥畀大家。至於出院條件經常會變，所以不便多講。
膳食方面，質素有驚喜，比一般醫院餐好好多，不過早餐份量有時我個人就唔太夠，所以建議有需要帶定小量乾糧。至於派水方面，基於衞生理由，只會派發支裝水同紙杯裝嘅熱水，房內唔會有熱水壺，所以有需要可帶定保溫杯。
出院方面，雖然唔會有接駁車，不過HKICC一出已經係亞博嘅巴士總站，好多區都去到，都幾方便，有需要可以預先上九巴app查詢巴士路線。」
患者最後鼓勵身邊同事：「大家加油，好明白大家雖然身體無太大不適，但連累到身邊同事及家人要隔離，不安比不適更難過，但係大家會好快好返，請保持樂觀心態一齊面對。祝各位早日康復，身體健康！」
以下為該名患者部分住院日誌﹕
2022-01-26：10:38 收電話通知初步確診
2022-01-28： 03:55 上白車去HKICC 04:20 到HKICC入院及檢測 08:30 早餐 09:00 見醫生,Ct值17 13:25 午餐 14:00 X ray 18:15 抽血 19:00 晚餐
2022-01-29：08:55 收口水樣本 09:10 早餐 09:45 見醫生 13:15 午餐 19:05 晚餐
2022-02-06：08:05 收口水樣本 08:50 早餐 09:30 見醫生 13:00 午餐 18:25 晚餐
2022-02-07：08:23 收口水樣本 09:15 早餐 13:05 午餐 15:00 見醫生 Ct值34 19:00 晚餐
2022-02-08：08:48 收口水樣本 09:00 早餐 13:00 午餐 14:45 見醫生 陰性 18:30 晚餐
2022-02-09：09:10 早餐 09:15 見醫生 陰性 13:00 午餐 14:00 出院
（大公文匯全媒體整理）
