筆是機場/稀思路
一般嘅政客，通常都會玩得政治越耐就越叻，即係所謂「人老精，鬼老靈」；不過，攬炒派政黨以至政客，就好似「唔識長大」嘅政治動物咁，喺香港玩咗三十年政治，但越玩越退步，除了識抽「政治水」，似乎就乜都唔識做，甚至連自己可能「大限將至」都唔知。今次筆者講緊邊個黨？當然又係曾經為攬炒派「第一大黨」嘅民主黨啦；昨日特首林鄭月娥發表今屆政府最後一份《施政報告》，而喺民主黨Facebook，就大大張圖寫住「希望呢份係林鄭月娥人生最後一份施政報告」。講真，如果講「最後一次XXX」，其實會唔會係民主黨「最後一次」回應施政報告先真呢？
筆者睇新聞，見到民主黨回應施政報告，當中有兩個「回應」值得商榷，包括「民主黨認為《報告》主要是配合國家十四五規畫，著重與內地融合，但未有着力處理本港問題」、「該黨認為，政府提出的北部都會區計畫，規模大於明日大嶼，但未提及實際建設預算，擔心會加重政府財政負擔」；睇到民主黨回應，筆者真心要講句，「條友真係唔識架喎！」
先講「《報告》主要是配合國家十四五規畫，著重與內地融合，但未有着力處理本港問題」的說法，其實依家全世界最大、亦係最有前景嘅市場，就係內地十四億人嘅大市場，莫講話香港，就算外國巨企都想把握好內地機遇，所以Tesla要喺中國設廠，不少世界巨富都爭住「巴結」內地；香港想發展經濟，唔配合國家規劃，難道要同反對派一齊玩「攬炒」？唔好玩啦！至於民主黨稱政府「未有着力處理本港問題」，筆者更加想問，其實民主黨有冇認真睇過份《報告》？著力解決房屋問題、大力發展創科、劃一長者生活津貼等等，呢啲唔係本港問題的話，什麼才是本港問題呢？
一個政黨，欠缺政策視野，「死得」；一個政黨如果無政策視野，而且政治上又犯上嚴重錯誤，「更加死得」！民主黨現時就是後者！民主黨上月底開會員大會，竟然無表決是否派人參選立法會，而且為黨員設限，想參選的黨員要先爭取黨內支持或者通過甄選機制，全國僑聯副主席盧文端評論事件時，就指出民主黨實質上以罷選對抗新選舉制度，由「硬對抗」變為「軟對抗」，黨員「已近乎不可能」獲得所需的選委會提名，「能否通過資格審查更是大有疑問」。即係話，民主黨搞「軟對抗」，喺政治路上已經難有運行，筆者唔明白，為何民主黨大難臨頭，還有心情在施政報告問題上「抽爛水」？民主黨嘅「傻」，應該唔係「扮」的！
中央完善選舉制度後，遊戲規則已經唔同晒，以前攬炒派可以吵呼鬧鬧，甚至可以擺明反政府、反中央；但攬炒派要明白，當他們已經玩到想顛覆政權，中央以至特區政府，都再唔會同佢哋客氣。如果民主黨仲想行從政路，就應該覺今是而昨非，靜思己過，然後改過，從此以愛國者身份議政參政；如果仲想用以前一套，筆者建議，民主黨不如及早解散，好過成日出嚟做騷，但又無人理佢哋，甚至淪為笑柄！」
