（香港文匯報記者 黃書蘭）反中亂港勢力恃住黃絲反智好呃，最鍾意借助媒體「造神」。聲稱「關注囚權」而成立嘅「石牆花」，早前因為驚國安法而急急腳散檔，有黃絲就摷返前「石牆花」成員甘鎧仲嘅訪問出嚟鞭屍，質疑當日佢曾經口響響咁話「做這些『在囚人士支援』、做『人道支援』是犯法的話，我們亦甘願進入牆內，成為大家的一分子」，仲被形容做「探監達人」。但該名黃絲就爆料話︰「一個月只探一兩次『手足』都唔知有無，主力想探『女手足』，咁仲叫做探監達人？」
甘鎧仲係「石牆花」3名全職員工之一，負責將不同途徑收集得嚟嘅探監物品，轉送予獄中嘅黑暴「手足」，涉嫌一邊斂財，一邊以物資「招兵買馬」，危害國家安全。
揭發唔少「石牆花」黑幕嘅fb專頁「每日關心林永旺助養狀況」日前就出post，挖返一段甘鎧仲被形容為「探監達人」嘅新聞質問︰「一個月只探一兩次手足都唔知有無，主力想探『女手足』，咁仲叫做『探監達人』？到底你係幫『手足』定係用幫『手足』嘅名義嚟溝女啊？」
有網民就笑打工都可以呃「光環」。「蘋果智能手機」話：「估唔到啲組織入邊啲人係咁×街，用相關嘅職權自肥……有冇人知一個月出幾多薪金？」「龍歪歪」就話：「收份糧做嘢都叫幫？」
糧支扮上菜 借屍「石牆花」度水
有網民則再揭甘鎧仲近日借「石牆花」解散一事向「手足」度水，叫人買清酒支持佢。「迷暈黨」話：「『石牆花』死唔夠一星期就出嚟叫人繼續支持佢，自己有手有腳唔×識返工？一句話冇咗『石牆花』佢自己就冇收入……」「綠帽約瑟」都話：「佢食人血饅頭，上面借『石牆』老朵去賣酒cap（掠）水自己袋。」
睇返甘鎧仲個fb，以前都冇乜地球post，但最近就不斷喺度賣酒，內容不忘提到「『石牆花』宣布解散，『探監達人』阿甘也失去了工作」「冇咗『石牆花』，我自然都冇咗收入」，叫大家可以訂清酒去支持佢喎。佢仲好識喺自己塊面度貼金，介紹自己時話「我叫阿甘，甘地個甘」，真係人唔笑，狗都吠。到底係咁叫啲人課金，係支持在囚「手足」，定支持冇收入嘅阿甘呢？唔使講到咁明啦啩？
