（香港文匯報記者 梁靜儀）高海寧（高Ling）與張振朗擔正演出的新劇《童時愛上你》原定在今年3月開拍，之後有傳劇集因劇本問題要煞停，直至昨日終於舉行拜神儀式，出席演員有高Ling、張振朗、陳展鵬、糖妹、吳家樂、楊卓娜及胡楓等。振朗透露新劇中要除衫騷肌，笑稱已成為新一代脫星，而陳展鵬與身高懸殊的糖妹飾演一對，他指這個配搭很有新鮮感很正。
高Ling與張振朗一起接受訪問，高Ling表示劇本修改後，故事大綱沒改動，但對白修改後更精準、深入及感性，她睇劇本有好幾場戲都被感動到想喊。劇中她的角色因意外失智，智商更只得8歲，要表現出好開心及跳脫，問到她角色有何難度？高Ling說：「要全日保持情緒高漲，兼要拍好長時間都會覺得攰，但由早到晚保持住8歲心態都好好玩，因少咗好多成年人嘅包袱及負擔，作為演員有更多發揮空間。」
張振朗亦大讚她演得好又生猛，而且善解人意沒穿高跟鞋遷就他的高度，不過兩人最難忍笑，他笑說：「如果計忍唔到笑，我哋一定包辦頭一、二位。」他又透露劇中與高Ling要假扮夫妻，問到二人可有親熱戲？振朗笑說：「有冇親熱戲？）冇，佢得8歲，我好有道德觀念，反而會克制住，仲好似家長咁成日鬧高Ling，唔畀佢掂呢樣，掂嗰樣。」
拍劇經常要除衫騷肌的振朗，透露新劇中都難逃一脫，更笑稱已成為新一代脫星，他笑說：「戲中講我做gym同出露台晾衫都要除一除衫，公司啲男藝員除衫多過女藝員，拍攝前只係輕輕操吓，冇之前操得咁厲害，因為拍完《拳王》後都好滿意自己身形，但今次唔想再操肌住，要唞一唞，好驚做gym，見到雞肉都驚。」高Ling笑指他爛船都有三斤釘，現時身形好配合角色。
買定士多啤梨接女放學
陳展鵬對於之前傳出劇本有問題被高層緊急煞停開拍，他表示之前的劇本不清楚，而劇中他的戲分比較重，又會與身高懸殊的糖妹飾演一對，加上二人又是第一次合作，大讚這個配搭很有新鮮感很正：「原本講我同高Ling係一對，但之後佢因為跌親失智認唔到我，而我又會教糖妹溝振朗，其間會發生好多笑料。」
展鵬又透露近日接拍了4套劇，日前才剛拍完另一套劇，隨即又開工拍《童》劇，幸好未有重疊，都拍得很舒服，更讓他有時間接送女兒上學。他笑說：「個女尋日（即前日）幼兒班開學，第一日因為要學分離，學校嚴陣以待，老師要家長放低小朋友後即走，由佢哋帶小朋友入班房，我都有回頭望兩眼，老婆就有啲眼濕濕，好似送機咁望住個門口，阿女都有喊咗幾分鐘，而我都有啲心得，就係買定阿女最鍾意嘅嘢食接佢放學，第一日就帶咗士多啤梨接放學。」他表示昨日因為要出席新劇拜神儀式，湊女返學的重任就交給太太單文柔負責。
