彭家麗最想挑戰Rock歌

（香港文匯報記者 文芬）日前彭家麗作客TVB娛樂新聞台節目《StarTalk》，接受主播許文軒（Edmond）專訪，大談推出翻唱專輯《絢麗》感受。彭家麗表示翻唱五六十年代經典歌曲需做功課，她說：「自己好鍾意聽五六十年代歌曲，但認識唔多，為咗今次專輯自己聽多咗好多。我覺得一定有先入為主，所以自己想為歌曲注入更多顏色，畀大家有一種新感受。」

家麗直言翻唱有壓力，她說：「因為其中一首歌《我一見你就笑》的填詞人夏丹姐姐親臨錄音室，我真係有啲緊張。其實夏丹姐姐好Nice，初初擔心佢會唔會好嚴肅，原來佢好搞笑、好活潑。由於市面都有好多歌手翻唱過，但歌詞總有些出入，所以今次我好好彩可以順便問返佢。」

彭家麗指專輯內有快歌，並且會排舞拍攝MV，她說：「可能我畀人感覺斯文，過去好似成日唱慢歌，我都好喜歡快歌。其實我最想挑戰Rock歌，我好鍾意搖滾，但暫時仲未有人發掘我呢樣嘢！入行32年，我覺得自己仲有好多可能性，所以希望乜都可以試下，與唔同音樂人合作擦火花，好似今次專輯我都被發掘我低音嘅一面，有兩隻歌嘅Key好低音。」