（香港文匯報記者 倪思言 報道）民主黨前成員許智峯走佬、「青年新政」前召集人梁頌恆又走佬，《蘋果日報》噚日仲報道咗一個15歲嘅少女明明冇被控都選擇「流亡」，真係睇到人眼都凸。化名為「Aurora」嘅佢原來仲係被控舊年10月喺荃灣暴動、曾中彈嘅曾志健嘅女朋友。唔少「黃絲」都話，個女仔又冇俾人告，質疑「流咩亡」，話佢係「借條仔過橋移民」就真。咁「黃圈」不嬲都係「兄弟爬山，互相利用」㗎啦。
揚言被跟蹤赴英尋「庇護」 自己友都質疑「冇俾人告做咩走」
化名為Aurora嘅女仔喺報道中話，自己曾經因為黑暴案件而被捕，但當時警方因為佢未夠16歲而無起訴佢非法集結罪。雖然係咁，但佢認為自己如果繼續留喺香港只會「越嚟越危險」，每日只可以等死或者等警方去「清算」佢喎 。
佢又懷疑因為一眾前線隊友被捕，所以自己一直被不明人士跟蹤 ，因此即使自己無俾人告，但都決意去英國尋求「政治庇護」。
Aurora日前就隻身去到英國，到埗後隨即俾當地海關人員帶走，並向英國政府申請「政治庇護」。據知佢已得到當局確認資格，將會為佢提供合適嘅安身之所。佢又話，自己由英國協助「流亡者」組織「Friends of Hong Kong」協助生活，未來會加入組織為其他「流亡者」提供援助。而組織嘅發言人Malcolm更加會針對患有抑鬱症嘅Aurora提供心理輔導等支援。
一個成功嘅「黃絲」故事，當然要煽下情。Aurora又透露自己喺前線抗爭中認識曾志健並成為情侶，但對於男朋友嘅暴動同襲警案會喺今個月再訊，仲有機會被判即時入獄，已經身在英國嘅Aurora就聲稱「傷心、不捨，連最後見面機會都冇」喎。係囉，邊個剝奪佢呢啲機會呢？
網民譏「唔吹雞點搞眾籌」
報道一出，有網民認為Aurora喺無被控任何罪名之下，都選擇逃離香港係借橋移民去英國生活，而且好多聲音都批評佢「假流亡，真移民」嘅行為相當可笑。又有人揶揄黑暴分子當初高叫手足要「齊上齊落」，但如今有事就個個走佬，選擇拋低隊友到外國「流亡」咁話，佢哋撇清關係嘅做法真係相當醒目。
「N展仔（崩潰）」就話︰「葡萄，有得移民英國。」「宅度宅」話︰「走咪走，仲咁大聲同人講托咩！」「白雲山蟋蟀」就揶揄︰「唔吹雞又點搞眾籌？」
