（香港文匯報 記者 子棠）楊千嬅的《MY TREE OF LIVE 世界巡迴演唱會》巡演了一年半，19日終於來到尾站第53場，總入場人次超過85萬，刷新了其個人紀錄。這次廣州站演出，千嬅亦刷新了當地場館的新紀錄，成為第一位女歌手在該場館開7場，歌迷更為她提早慶生。千嬅回望時發現自己還有好多可能性，未來可期。適逢今年出道30周年，千嬅亦已準備好驚喜送給歌迷，會有新的項目，亦會推出已灌錄的新歌，並呼籲大家直面恐懼，勇闖難關。慶功宴上主辦單位更備了接近200萬元現金給團隊大抽獎，人人有份。
廣州演唱會的其中三場分別邀請了衛蘭、江海迦（AGA）、周柏豪擔任表演嘉賓，柏豪更於台上表示，「『做歌手跟做人一樣，不同階段都會有人嫌棄你，上一層又重頭再來，要落實堅持，加油周柏豪！』千嬅呢句說話喺我心入面十年，我今日有咁嘅成績，就係呢句話不斷鼓勵我，多謝千嬅。」
直面恐懼涅槃重生
來到最後一場，千嬅特意把整個演唱曲目流程大倒轉，由最後一首唱到第一首，「這個演唱會的核心價值，就正如這晚，結束亦是一個開始。人生的經歷，就係生生不息一直不斷循環，不會有永遠的順境或逆境。我們一次又一次遇到唔同的挑戰，每一次的結果都係不一樣，甚至會毀滅心切化為灰燼。但我好想同大家講，其實不需要害怕，相信所有毀滅其實係個天畀你機會重新開始。每一個開始只係要表達一個最強大的自己，不需要恐懼，最大辦法就係面對恐懼，即使有一日，我又再變為灰燼，但唔需要害怕，只要我相信生命仍有值得慶祝的事情，我可以你都可以！保護我哋係每一個年輪，有放棄的勇氣，不如變成往前走的勇氣，希望我的音樂可以陪着大家，很感謝你們用這53場一齊興建了一個很大的森林。」
學懂釋懷感恩親友
2025年是千嬅出道的第30年，「感謝同我一齊成長嘅歌迷和歌迷會，今晚唱到很多舊歌都感觸落淚，每首歌詞都將我人生再顯示一次，令我又感動又感恩。走過半百人生，終於明白『歲月長衣裳薄』，懂得如何『忘記智商去做人』去修煉人生，我以前好執着，好想成功，不斷努力追求，好想證明畀人睇我可以，好想我父母因為我自豪。𠵱家經歷過咁多層次唔同咗，不用再追求別人認同，我𠵱家好開心，我好自豪有咁好嘅父母，有咁好嘅團隊，咁好嘅歌迷，自豪自己有咁多好歌，自豪曾經認識過很多工作上嘅好夥伴，幫我好多。我要多謝我個仔，畀我咁多正能量。」
巡演過後，千嬅謂真係可以好好休息，「首先要養好自己身體，放鬆心情休息幾個月，享受新年的家庭樂，乜都食得！」
慶功宴上，千嬅開香檳切生日蛋糕，主辦單位更備了接近200萬元現金給團隊大抽獎，人人有份。千嬅感謝台前幕後所有工作人員，「多謝各位21個月來的辛苦，經歷了春夏秋冬！呢個演唱會對我來說係一個獎項，呢五年遭遇人生起跌，一度以為自己係咪就咁返去湊仔算了；今日回頭望，原來自己好多嘢未做完，演唱會由籌備到今日發現自己仲有好多可能性，我嘅前途仲可以發育，哈哈！呢個巡演識到好多新知舊友，同我一齊創造佳績，期待之後再同大家創造更多美好未來！今晚咁開心冇理由唔飲（酒），丁生（老公）唔好禁止我，最多一啖酒一啖中藥！」
（來源：香港文匯報B07：娛樂 2025/01/22）
