吳卓羲擇偶條件 最緊要心靈扶持
憶出道拍劇備嘗辛苦 獲母親激勵堅持下去
吳卓羲（Ron）與張曦雯因合作TVB台慶劇《璀璨之城》而傳出的緋聞。Ron近日接受資深傳媒人查小欣網上節目《紅查館》專訪時，剖白擇偶條件與婚姻觀，坦言揀老婆最緊要溝通與心靈扶持，「娶老婆你梗係想……要靚啦，要溫柔。當然要溝通到，心靈上大家可以扶持下。另外要有共同嗜好，例如睇戲、影相。」 但被問到會否考慮閃婚，他即斬釘截鐵否定，「結婚隨緣啦，呢啲嘢唔好畀咁多壓力自己。」
談及演藝工作壓力，吳卓羲在訪問中重提初出道時搏命拍劇的辛酸史，自爆最高紀錄試過連續「七日六夜」冇瞓覺：「你做唔做？唔做大把人做。點記對白？記唔到，NG到飛起。」 他憶述當年剃頭着清裝與劉松仁合拍古裝劇《英雄·刀·少年》演師徒，捱到第7日最後一日要應付兩頁紙對白，結果精神透支狂食螺絲，向導演要求收工，但仍被對方拒絕。
他更坦言當年曾辛苦到在偏遠外景場地爆喊，打電話向媽媽哭訴想放棄幕前工作，「打電話畀我媽媽。喊，係啊，喊。我話我唔想做，我話好辛苦。跟住我媽媽同我一齊喊，佢話：『你身為一個男人，你唔做都要拍埋呢部。』我好記得呢一句說話，講完之後，我就堅持落去。」
片場遇靈異事件
入行多年經常親身上陣拍動作戲，亦令吳卓羲換來周身傷患，「手呢啲打到筋膜炎，腳全部都彎彎哋。」 提到早年與好兄弟林峯合拍經典劇《大唐雙龍傳》，兩人更是一起經歷中暑、流血意外甚至片場「畀鬼壓」奇遇：「拍《大唐雙龍傳》有試過，我同阿峯（林峯）等緊埋位，我見到佢同我講嘢，但我動彈不得，可能係太攰。」
