林峯爆女兒愛漢服 難忘中秋夜遊古城
育有6歲囡囡「格格」（Luna）的林峯自升呢做爸爸後錫千金錫到燶，太太張馨月亦不時在社交平台分享丈夫與囡囡的甜蜜互動，這位昔日「Chok王」已變身成「寵女狂魔」。一年一度的中秋是藝人吸金的大日子，林峯亦要為口奔馳，他在中秋要為新戲開工無法與妻女過節。不過，近日林峯接受本報專訪時分享父女中秋的珍貴回憶，大爆早年曾攜眷在內地的古城過了難忘一夜，這位奶爸亦回味這個與囡囡難得的親子時光，更透露格格熱愛漢服文化：「佢話自己都想着，因為漢服多唔同款式，女仔都係貪靚！」 撰文：梁紹明
2026年至今，林峯可謂忙得不可開交，早前完成電影《九龍城寨之終章》，之後亦先後為其老闆古天樂的紅館、澳門演唱會擔任嘉賓，本身亦在內地不同城巿開巡唱。全家居於上海的林峯，早前他特地回港到旺角出席代言月餅品牌活動，大擦麻辣牛肉月餅及流心奶黃月餅，工作之餘乘機提早享受節日美食。
格格黐身父女難捨難離
中秋節期間，林峯將要拍攝賀歲電影，之後亦有其他電影拍攝工作，預計將忙至農曆新年後。阿峯稱：「我喺戲與戲之間也會返上海陪幾日囡囡同老婆！」提到女兒格格，林峯愛死這位前世情人：「佢已經6歲，開始黐爸爸，每次我走佢都會忍住唔想畀我見到佢唔開心，好Sweet！」他強調工作若有空檔便會飛返上海見囡囡。的而且確，林峯曾在訪問中指小朋友大得快，憶起曾出外工作一周，回家見女兒已長高不少，因此他亦更珍惜父女相處時光。
全家遊古城買燈籠𠱁千金
問及過往與格格的中秋節，林峯想了又想，坦言曾與妻女度過滿足一夜，回想時亦笑得開懷：「有一年，囡囡差不多4歲左右，我哋喺內地一個城巿，好似喺旅遊景點入面﹐類似古城嘅地方行夜巿！」阿峯指當晚與太太、囡囡、外母等同行。他續稱：「嗰個地方有得坐船，好似穿越到古代咁、好正、好好氣氛，現場亦好多人，我都喺現場買咗燈籠畀格格應節！」林峯坦言格格喜愛熱鬧，那年的中秋現場充滿節日氣氛，全家亦深感滿足。
6歲生日穿漢服開派對
提到內地各大古城也有不少穿漢服的網紅或少女穿梭拍照打卡，原來林峯的掌上明珠也喜愛這種傳統服飾：「嗰晚佢見到都好開心，話自己都想着，之後當然都有着過！感覺好似cosplay咁好好玩！同時漢服款式好多，囡囡都係一個貪靚嘅女仔！」回想兩年前這個中秋節，這位「寵女狂魔」亦回憶滿滿：「嗰次遊古城真係好難忘，係囡囡第一次咁熱鬧過中秋節！」至於阿峯太太張馨月也有為愛女開設小紅書賬戶，記錄格格成長點滴。早前9月開學，她亦發布林峯拖女兒返學的背面照片，畫面超級溫馨；至於上月尾格格踏入6歲亦穿上漢服，與其他小朋友開生日派對，果然熱愛漢服文化。
湊仔公享受親子時光
近年，林峯已「升呢」成動作演員，他在煞科不久的《九龍城寨之終章》繼續打到天昏地暗，但一向專業的他從不錫身，拍攝時手、腳也受傷。日前他在旺角現身活動時，乘空閒時間也刻意鬆一鬆筋骨。他自爆囡囡也發現其傷勢。阿峯回想道：「嗰女都習慣咗見到爸爸受傷，見到傷處也會好奇問『真定假？』，仲問係咪化妝嚟，因為我喺拍攝現場化晒妝時都會同佢視像對話！」一向演藝工作繁忙，林峯即使行程緊密也未敢忽略女兒的重要時刻，早前有空檔抽空陪愛女迎接開學。他說：「嗰女喺上海開學，當時我每日都送佢返學，見到佢學校啲設施好齊備，我都想重返校園！」格格就讀的幼稚園是上海的頂級國際學校，林峯曾透露愛女除了學彈鋼琴，亦有參加騎馬、游泳等興趣班，落力栽培寶貝女。事實上，自從升呢人父後，林峯的好爸爸形象漸獲觀眾受落，現時他無論在內地、本港也深受歡迎，為事業打拚多年可算踏入收成期，阿峯亦曾表示希望再做爸爸，未知這位男神可會在年尾有好消息公布。
