VAR爭議 裁判官方認錯 曼城越位入波照挫紅魔
周日晚英超曼巿打吡，出現連串爭議場面，在上半場早段已踢少個的曼城，於60分鐘憑夏蘭特的入球奠勝。不過該入球過程處於越位位置的曼城中場安素費南迪斯，明顯有影響比賽，但經過視像助理裁判（VAR）介入後，竟然判入球成立，曼聯最終於主場輸0:1。裁判機構官方賽後立即發聲明，承認球證「判斷錯誤」，難怪「紅魔」將帥非常憤怒。
今場打吡大戰氣氛緊張，比賽到23分鐘便出現火爆場面，曼城菲爾科頓在曼聯隊長般奴費南迪斯力逼下倒地，般奴疑似抽水踢向科頓，科頓不滿即伸腳「撐」向般奴腹部，結果被球證奧利華出示紅牌。不過包括曼城領隊馬利斯卡、甚至曼聯名宿堅尼，都認為般奴才是肇事者，理應同樣受罰。
曼聯人多打人少之後有拉舒福特及明奈先後射中門柱，逃過大難的曼城在60分鐘出現關鍵轉機，加華度爾左路傳中，夏蘭特遠柱接應射入，最初旁證舉旗示意夏蘭特越位，但VAR覆核發現曼聯的柏德列多古包了越位。不過明顯處於越位位置的安素費南迪斯，門前幾碼試圖插水式頂波，只是僅僅未能頂中。根據球例，越位球員就算沒有觸球，只要有意圖去影響進攻都應被判越位。可是VAR及球證都忽略了，最終判決入球成立。
負責管理英格蘭球證的Pro Ref賽後即發聲明認錯：「我哋就夏蘭特嘅入波解說──VAR證實夏蘭特冇越位，而越位嘅安素費南迪斯並冇掂波，所以安素有冇越位犯規，就變成主觀判斷。喺呢個情況下，VAR未有察覺安素對比賽嘅影響，VAR理應建議球證去場邊睇重播，但結果冇做到。我哋已經聯繫曼聯，承認今次係錯誤判斷，並將對此事進行調查。」
卡域克稱難以置信
曼聯領隊卡域克賽後沮喪地說：「我好唔明白！依家有幾多鏡頭、幾多人去幫助球證執法？我更加擔心球證點樣去演繹球例，如果安素咁都唔叫影響比賽，我真係理解唔到。睇番重播之後，球證嘅解釋令我更加嬲，簡直難以置信！」鬧完之後，卡域克亦不忘為曼聯打氣：「今場我哋表現都有好嘅地方，我會帶走呢啲正面嘢離開。今場係曼聯今季第2次輸波，但我哋會重返勝軌。」
