Twins年尾會展騷 唱盡滄海遺珠
Twins昨日（10日）宣布，將於12月18至20日在灣仔會展舉行一連三場Sidetrack演唱會。二人今次不選紅館，單純想以歌會友、與歌迷近距離接觸。
談到終於開Sidetrack Show，阿Sa直言：「因為未開過囉。」阿嬌接力：「同埋我哋畫餅都畫咗十幾年啦，哈哈。」阿Sa指以往推出不少專輯，但並非每首歌都能派台，「入面有好多滄海遺珠、好多好歌，好想趁呢個機會唱番畀fans聽。」對於歌迷笑她們經常走數，阿嬌表示：「同找數冇關係嘅，係純粹我哋想開。」至於選在會展開騷，阿Sa解釋Sidetrack演唱會不想用太大場地，並笑說：「驚唔夠人啦。」
歌單方面，阿Sa坦言第一輪選出60多首Sidetrack，之後再篩選還剩40多首。問到會否於社交平台收集fans意見，阿Sa表示大概知道fans喜好，「因為我哋每一次開演唱會到最尾點歌嗰一part，有啲歌佢哋永遠重複又重複咁樣點。」
