【愛蘭說】左腳中國右腳哈薩克的魔幻時刻
龐愛蘭 香港十大傑出青年、健康城市聯盟（香港）副主席
早前喺烏魯木齊飲天潤牛奶，冇諗過新疆嘅魅力沒法擋。今次飛去伊犁，一落機，乾燥嘅風入面有陣草原草香，仲有種講唔出嘅浪漫。
伊寧六星街嘅夜生活同香港好唔同，凌晨一兩點，後生仔仍然買羊仔公仔送禮，熱鬧又有人情味。我買到獨特手袋同披肩，講價到五十蚊都有成交，檔主全程笑住傾，呢種親切香港已好難搵到。更令我驚喜嘅係當地嘅麵包，可以擺足成個禮拜，入面塞滿提子、杏仁同合桃，好味道。我仲第一次食到新鮮綠色外殼嘅合桃，味甘又脆，係難得的味覺體驗。
特克斯八卦城更加震撼，企上太極壇頂，八條大街向八方散開，似足地上易經。草原上嘅自由奔放令人嚮往，夜晚九點幾先天黑，彷彿偷多咗幾小時日光。
最後一站霍爾果斯口岸，絕對係商機處處。企喺中哈合作中心界碑旁，左腳中國，右腳伸過去就係哈薩克斯坦，瞬間置身兩種經濟體嘅交匯點。貨品由蜂蜜到獨特果醬、咖啡豆等。這些產品品質天然，喺香港、東南亞、甚至歐洲等都有市場潛力。霍爾果斯作為「一帶一路」關鍵節點，中歐班列直通，物流同關稅優勢顯著。如能善用呢個跳板，將哈薩克優質農產品重新包裝，精準銷往香港、星馬、日韓以至歐盟等，每一步都嗅到跨境貿易嘅契機，細味就知潛力無限。
伊犁畀我嘅係另一層次嘅新疆。呢度嘅多元，在於每個人都自在做自己，同時深知彼此屬於同一片土地。伊犁素有「塞外江南」之稱，47個民族共居，交織出草原、農耕與屯墾文化。由古絲路重鎮到今日霍爾果斯口岸，伊犁始終係中國向西開放嘅經貿通道，生活質素與商業機遇並存。呢片土地，值得每個人親身踏足，用五感去體會。
