【地產箴言】一生人總有機會買樓
湯文亮博士 紀惠集團行政總裁
有朝早跑完5公里後去到會所，有住客話有晚與幾個朋友食飯，有人話租金太貴，政府應該推出租管，不過，大家記得那位朋友以前是有自住單位，而且不止一個，而是兩個，但後來點解要賣走就不得而知，總之現在就要租樓住。
市場上經常有一些KOL話樓市會大跌，當時是樓市逃生門，有一些業主遇啱有人畀一個好價，在心大心細之下就會將自住單位賣走，手上有一筆錢，生活質素立刻改善，但慢慢就會發覺自己什麼都沒有，每兩年就要睇業主面色一次，最後，將責任推畀政府，話公屋唔夠多，政府冇管制業主，其實，責任在他們自己身上，在冇必要情況下將自住單位賣走。
大家可能唔信，反而從未有樓的業主是不會鬧政府，因為，他們一定試過有機會，而且不止一次買入自己能夠負擔得起的單位，但是他們親手將這個機會推開，所以，他們是不會鬧政府，只是希望再次有這個機會，不過又很奇怪，到了真的有這個機會時，他們又會再次推開，老實說，任何人的一生，總有機會買入一個自住單位，上天唔會連這個機會都唔畀你。
內地將唔會有爛尾樓
講開又講，有晚一個人在馬會食飯，見到一個老友亦是一個人食，兩個單人餐都唔錯，老友話爛尾樓對於內地來說，始終是一個大問題，究竟應該點樣解決？我說已經解決緊，內地最新公布，發展商唔准賣樓花，咁樣即是唔會出現爛尾樓，可以的話，發展商會處理還未建成的樓宇，雖然唔可能解決所有爛尾樓問題，但起碼唔會再增加，如果能夠嚴格執行，爛尾樓問題將會減到最低，現在才唔准賣樓花，似乎是有些遲，不過，遲到好過冇到，而事實上唔准賣樓花這招，是要頂得住地產商壓力，並非咁容易，能夠買現樓始終令買家放心吧。
