夏蘭特剪髮沖喜 曼城反勝般茅
維拉脫腳慘吞白禮頓4蛋
「藍月亮」曼城於周日晚英超飽吃驚風散，在絕大部分時間落後的劣勢下，於尾段及補時連入兩球，以2:1反勝般尼茅夫。王牌前鋒夏蘭特剪掉一頭長髮，今仗以清爽短髮look亮相，雖然未能因而開齋，卻為曼城帶來好運！新帥馬利斯卡賽後揚言，球隊在轉會窗關閉前仍會積極補強。
般尼茅夫在上半場26分鐘，憑馬科斯達華尼亞入波先開紀錄。落後的曼城要苦戰至完場前5分鐘，才憑馬克古希接應卓基開出的角球頂入扳平；後備入替的卓基更在補時階段交出靚絕直線，由加華度爾射入。馬利斯卡賽後說：「今日係完美日子，比賽氣氛一流，我哋贏得險，但考慮到全場創造咗好多機會，我認為絕對配得上勝利！當然我哋仲喺重建中，仲會繼續買人同嘗試唔同戰術。」據報曼城已經與法甲里爾達成共識，以約1億歐元收購年僅18歲的摩洛哥中場新星保亞迪。
基於眾多星級戰將剛踢完世盃，英超多支勁旅在開季都未有最佳狀態，繼周六曼聯與熱刺雙雙失準慘敗後，阿士東維拉與利物浦昨晨亦相繼失分。尤其上季聯賽「四哥」兼歐霸盃冠軍維拉，首戰作客白禮頓竟然只踢31分鐘便落後0:4，最終亦以相同比分慘敗。
維拉今夏失血多，摩根羅渣士、泰利文斯、盧卡斯迪治尼及安斯干沙已先後離隊，射手奧尼屈堅斯亦受到沙特聯希拉爾利誘，好大機會他投。今仗再有新兵祖奧高美斯於上半場魯莽犯規被逐，令球隊陷入崩潰。領隊艾美利賽後說：「對手把握到我哋每一次犯錯，賽果當然失望，不過我哋正在重建，亦會買人，再盡努力打造今年想要嘅新球隊。」
利物浦驚險逼和紐卡素
至於今季改由伊拉奧拿領軍的利物浦，作客面對有多名主力離隊的紐卡素，亦在兩度落後下，苦戰至補時9分鐘，才憑蘇保斯拉爾射入12碼，2:2逼和對手倖保不敗。伊拉奧拿賽後說：「喺惡劣形勢下，我要讚賞球員從未放棄，不停向對手施壓，雖然和波唔係我哋原本想要嘅結果。」紐卡素新帥查斯利則對補時被判極刑感到不滿，他認為賀爾膝頭碰到紅軍域陀蒙路斯的犯規，並不足以判罰12碼。
