掗拃女橫向握遮前後揈被網民狠批
踏入雨季市民大都遮不離手，但香港地人多路窄，手持長遮一不小心隨時會影響他人。近日有網民在Threads發帖，目擊一名女子在港鐵站內橫向持遮前行，期間不斷大幅度前後擺動，大鬧「睇少眼都俾佢拮死」。帖文引起廣泛關注，網民一致鬧爆相中人行徑。
樓主在帖文寫道：「老老實實，我真係好憎人咁樣揸遮，睇少眼都俾佢拮死」。其上載短片顯示，港鐵站內有一女子左手橫向握着藍色長遮，並大幅度前後擺動左手，幸當時無人緊隨其後前行，未有發生長遮誤刺他人的意外。
大批網民留言宣洩不滿，大鬧「好無公德心」、「呢個人好自私，永遠唔會企喺人哋立場」、「做女人行到掗掗拃拃，好核突」。多名網民更分享曾遇過同類橫向持遮的自私精，「上次搭地鐵就係有條女咁樣攞遮，然之後佢把遮個篤篤係金屬，刮到我隻腳一大條血痕」，有人語重心長說：「希望事主可以喺Threads見到自己，從而改過自新」。
