四口家火鍋放題喪點餐 剩肉倒進鍋急閃惹公憤
港人愛食放題，但浪費食物問題卻時有所聞。日前有女食客到將軍澳一間人氣連鎖火鍋店食消夜放題時，就目擊鄰枱一家四口瘋狂點餐，除柯打多款肉類海鮮外，更狂叫24個芒果布甸及24碟蜆，且對店員態度惡劣，最終食剩滿枱食物，限時完結前還將大堆肉類倒進鍋裏，另疑怕店方追究，一家匆匆鬼祟離去。樓主拍下「罪證」發帖公審，惹來網友鬧爆四口家「貪心」、「眼闊肚窄」、「無衣食」，並踴躍獻計「支持浪費食物罰款」。
樓主近日於Threads發帖講述當晚8時20分甫入座，赫見鄰枱一對父母跟子女已不停投訴，「又話未開code又話冇熱水，對啲店員個態度已經勁X差」。一家點選海鮮後，就要求店員幫忙落單要24個芒果布甸，店員建議可分開下單吃完再上，「跟住個男人就發晒脾氣鬧店員，話我哋一定食得晒！」其後再加點24碟蜆、大量肉類、蒸包及點心。樓主看不過眼出言相勸：「食得晒先好嗌！」卻遭該母親反駁：「我哋一定食得晒」。樓主即做「花生友」暗中觀察，「食到10：30都見到兩大盤肉仲喺度，我仲諗緊會唔會嚟個絕地反擊，最後15分鐘食晒」。殊不知一家竟將大量剩肉倒進鍋裏，「最後仲要知道身有屎咁，4個突然一齊起身勁快走咗去」。從相片可見餐枱還剩餘生肉4碟及蒸包和雜菜各1碟。
網民轟眼闊肚窄食相差
網民怒轟4人是「大嘥鬼」、「極品家庭」，直斥「黐線，貪得無厭，食相咁差」、「浪費糧食遭天譴」、「會有報應」，針對放題浪費食物問題，網民紛紛建議「任食餐廳全部食唔晒逐gram收錢然後打包拎走」、「酒樓可以等佢食到咁上下先再出食物」，甚至提出「要blacklist呢家人，同埋追討罰款」，杜絕慣犯浪費食材。
