大叔受電話遙控ATM轉巨款 兩醒目女識破電騙及時勸阻
電騙手法層出不窮，一不小心隨時中招！有女網民近日發帖分享與人聯手阻止電騙經過，指在櫃員機前遇上手持大疊500元現金的大叔，開着手機揚聲器聽從「鄉音男」指示準備存款轉賬。千鈞一髮間樓主與在場一名姨姨透過「眼神對望」，即心領神會知道大叔遇上電騙，齊上前阻止保住大叔血汗錢。網民大讚兩「女俠」見義勇為、「好人一世平安」，又呼籲「見到有懷疑就幫幫手出聲制止，救一個等於救一個家庭」。
樓主在社交平台Threads發帖，留言「好開心！今日做咗件好事」，指日前到屯門櫃員機撳錢，聽到旁邊大叔聽從手機傳來的男聲準備轉賬，「我喺櫃員機啦，你教我點過畀你」，只見「鄉音男」講出一個賬號並指示輸入。
網友感恩好人好事功德滿滿
就在大叔思考期間，樓主留意到他原來手持大疊500元現金準備存入，正猶豫應否阻止，在場一名姨姨就跟她來個「眼神對望」，心裏同樣「覺得有懷疑」，遂聯手上前並問大叔是否認識「鄉音男」，大叔稱不認識，僅聽從其指示往櫃員機過數予「電訊公司」，兩人即解釋這是典型電騙手法，成功勸止大叔取消過數，「有咩懷疑要去門市搞，好多嘢都唔會要求你去櫃員機過數㗎！」事後樓主更與姨姨握手慶祝，「最重要係阻止咗一單騙案，幫咗阿叔繼續袋袋平安」。
帖文兩天收逾2.1萬個讚好，網友大讚兩人機警又善心，「感恩好人好事」、「功德滿滿」、「叔叔好彩有你同個阿姨！幸保不失！」有網民則分享類似經驗，「有個婆婆喺櫃員機度開Speaker撳撳撳講『吓，邊度？你講多次』，聽多兩聽啲內容，之後隔籬啲街坊即刻喝住婆婆叫佢唔好呀，收線，呃人㗎！」有網民不諱言：「多謝你哋見義勇為，互相守望好重要」。
