殯儀館月薪3萬請接待 網民冇有怕 驚窮唔驚鬼
正所謂重賞之下必有勇夫，見諸職場亦同樣適用。有網民近日發帖轉發搵工平台有關九龍殯儀館招聘前台接待員的廣告，工作性質與普通文職相近，但月薪就有1.8萬至3萬元，且中三學歷已可申請，瞬間引發熱議。有網民聯想到有機會「撞鬼」即耍手擰頭，但也有不少人百無禁忌高呼「正喎」、「啱我」、「唔好同我爭」，更有人帶出重點，直言「我唔驚鬼，我驚窮」。
據樓主在社交平台Threads的帖文提到，該份前台工作每周上班6天，主要負責「接聽電話預約，現場及電話客戶查詢，電腦資料入機，現金收款點算，到銀行處理公司支票及現金，公司日常繳費，記錄出入數。」月薪1.8萬至3萬元，按經驗而定；分朝9晚6或朝10晚7兩更，但需輪班，黑雨及8號風球亦須如常上班。
應徵者只需中三程度，語言要求有熟練的廣東話及基本的普通話和英語能力，書寫方面則需熟練繁體中文及基本英文能力。其他技能包括須懂中文輸入法及使用微軟Excel及Word。
笑問撞鬼會否計工傷
帖文招來大量留言，不少網民均覺薪酬吸引，「幾好啊啱啊」、「想做」，亦有人聯想到「撞鬼」而卻步，笑言「搵鬼做」、「撞鬼計唔計工傷？」不過有網友則認為無需杞人憂天，「都係做office嘢，有乜好驚？」「都唔使返夜晚，ok啊」，部分則從現實角度出發，「我失業嘅話都會去做，反正冇咩驚得過做死窮鬼」、「唔好同我爭啦，冇飯食啦我」、「大把鄉（香）港人應徵，窮慘L過見鬼！」有網友更道出殘酷的事實：「認真講，其實生人仲恐怖過鬼啦，應該冇人唔同意」。
