糖妹廚藝黑歷史 煮湯整爛煲
歌手糖妹日前以大使身份出席在學院舉行的親子活動，置身家政室同一班幼稚園學生及家長聚會時，一眾人齊齊挑戰考手勢的傳統小食龍鬚糖。糖妹坦言：「平時煮食都成日『炒車』，仲試過煮龍蝦湯搞到個煲都爛埋，誇張程度令到我啲朋友都驚咗我，叫我唔好再下廚。」
糖妹雖被戲稱是「地獄廚神」，但當日終於成就解鎖，成功製作出又甜又脆的龍鬚糖小食，她多謝小朋友謂：「都要多得導師同小朋友幫我打氣，我先可以成功，人生第一次成功整到龍鬚糖，我掂咗喇！」現場亦有不少家長及子女互動溫馨場面，糖妹讚揚家長平時返工好辛苦，但一放假就會陪小朋友到處玩，令人感動。
